पुणे : दोघांची ओळखीतून मैत्री झाली. रात्री दहा वाजता त्या तरुणाने तरुणीला पर्वती टेकडीवर भेटण्यासाठी बोलावले आणि तिथेच ती फसली. त्या तरुणाने तिच्यावर बलात्कार केल्याची धक्कादायक घटना समोर आली आहे. घटना घडल्यानंतर ही आरोपीकडून तरुणीला त्रास देत असल्यामुळे तिने पोलिसांकडे धाव घेऊन तक्रार दिली. याप्रकरणी दत्तवाडी पोलिसांनी गुन्हा दाखल करून आरोपीला अटक केली आहे.
योगेश मोहन मंद्रे (वय २२, रा. निखील पार्क, माणिकबाग ) असे अटक केलेल्या तरुणाचे नाव आहे. याप्रकरणी २२ वर्षीय तरुणीने तक्रार दिली आहे. २४ नोव्हेंबर रोजी रात्री दहाच्या सुमारास पर्वती टेकडीच्या जंगलात ही घटना घडली.
पोलिसांनी दिलेल्या माहितीनुसार, तक्रारदार तरुणी ही मॉलमध्ये व आरोपी हा एका कंपनीत काम करतो. मॉल व कंपनी हे शेजारी असल्यामुळे त्यांची ओळख झाली होती. त्यातून त्यांची मैत्री झाली होती. २४ नोव्हेंबर रोजी रात्री आरोपीने तरुणीला पर्वती टेकडीवर भेटण्यासाठी बोलविले होते. त्यानुसार तरुणी त्याला भेटण्यासाठी गेली. त्यानंतर आरोपीने तिला पर्वती टेकडीच्या जंगलात घेऊन जात तिच्यावर बलात्कार केल्याचे तरुणीने तक्रारीत म्हटले आहे. या घटनेनंतर तरुणी घरी गेली होती. त्यानंतर देखील आरोपी हा तिला सतत त्रास देत असल्यामुळे तिने पोलिसांकडे जाऊन तक्रार दिली. याप्रकरणी दत्तवाडी पोलिसांनी आरोपीला अटक केली असून अधिक तपास सुरू आहे.