राज ठाकरे यांनी नगरसेवकांना सुनावले

महापालिका निवडणुकीत पुणेकरांनी आपल्याला विरोधी पक्ष होण्याची संधी दिली. त्याची जाणीव ठेवून विकास आराखड्यातील लोकहिताचे निर्णय घ्या.

पुणे : महापालिका निवडणुकीत पुणेकरांनी आपल्याला विरोधी पक्ष होण्याची संधी दिली. त्याची जाणीव ठेवून विकास आराखड्यातील लोकहिताचे निर्णय घ्या. लोकहिताविरोधातील आरक्षण रद्द करण्यास विरोध करा, असे महाराष्ट्र नवनिर्माण सेनेचे अध्यक्ष राज ठाकरे यांनी नगरसेवकांना आज सुनावले. महापालिकेत मनसेचे २८ नगरसेवक असूनही त्यांचा विरोधक म्हणून प्रभाव दिसत नाही. त्यामुळे प्रारूप विकास आराखड्यावर महत्त्वाची भूमिका घेण्यासाठी ठाकरे यांनी पुण्यातील मनसे नगरसेवकांची मुंबईत गुरुवारी बैठक घेतली. त्या वेळी शहराध्यक्ष बाळा शेडगे, गटनेते बाबू वागसकर, माजी गटनेते वसंत मोरे व रवींद्र धंगेकर यांच्यासह काही नगरसेवक उपस्थित होते. परंतु, निम्म्याहून अधिक नगरसेवक बैठकीला गेले नाहीत. पक्षाअंतर्गत गटबाजीमुळे नगरसेवकांनी बैठकीला दांडी मारल्याचे लक्षात आल्यानंतर ठाकरे यांचा पारा चढला होता. शहरातील महत्त्वाच्या विषयांवर पक्षातील नगरसेवकांत एकोपा दिसत नाही. प्रत्येक जण आपल्याला वाटेल, त्यापद्धतीने कामकाज करीत आहेत. त्यामुळे पक्ष वाढणार नसून, संपणार आहे. आपल्याला नक्की काय करायचे ते ठरवा. यापुढे किमान प्रारूप आराखड्यातील आरक्षणावर चुकीचे निर्णय घेऊ नका.पुणेकरांच्या हिताचे निर्णय घ्या. मात्र, नागरिकांचे हित नसलेल्या विषयांला विरोध करा, असे ठाकरे यांनी नगरसेवकांना सुनावले.