पुणे : महाराष्ट्र साहित्य परिषदेचे कार्यवाह, कवी, गझलकार दीपक करंदीकर यांचे बुधवारी रात्री साडेबाराच्या सुमारास निधन झाले. त्यांच्या पार्थिवावर गुरुवारी सकाळी अंत्यसंस्कार करण्यात येणार आहेत. करंदीकर हे गेल्या तीन -चार दशकांपासून गझलकार आणि कवी म्हणून ओळखले जात होते.
तसेच महाराष्ट्र साहित्य परिषद, पुणे या प्रमुख संस्थेचे ते स्थानिक कार्यवाह म्हणून कार्यरत होते. त्यांचे‘धुनी गझलांची’ (२००१), ‘कविकुल’ (२००९) हे गझलसंग्रह व कवितासंग्रह प्रकाशित झालेले आहेत. ‘गझलगंगा’ हा गझलसंग्रह प्रकाशनाच्या वाटेवर होता. तर ‘अभिनव श्रीव्यंकटेश माहात्म्य’ (२०१६), ‘संगीत श्रीनिवास-पद्मावती विवाह नाट्य’ – पाच अंकी संगीत नाटक (२०२०) ही श्री तिरुपतीवरील पुस्तके प्रकाशित झालेली आहेत. त्यांच्या साहित्यिक कारकिर्दीत अनेक पुरस्कारांनी त्यांना सन्मानित करण्यात आले होते. त्यांचे पाचअंकी संगीत नाटक रसिकांच्या पसंतीस उतरले होते.