आळंदी: टाळ - मृदंगाच्या निनादात आणि पुजाऱ्यांच्या मंत्रोच्चारात शनिवारी (दि.२७) सकाळी नऊला मंदिराच्या मुख्य महाद्वारातील गुरु हैबतबाबांच्या पायरीपूजनाने माऊलींच्या ७२५ व्या संजीवन समाधी सोहळ्यास अर्थातच कार्तिकी यात्रेस सुरुवात करण्यात आली. माऊलींच्या मंदिर महाद्वारातील गुरू हैबतबाबांच्या पायरीपूजनाच्या मुख्य कार्यक्रमाला सकाळी नऊच्या सुमारास भक्तिमय वातावरणात सुरुवात झाली.
माऊलींचे पुजारी श्रीनिवास कुलकर्णी, अमोल गांधी व श्रीरंग तुर्की यांनी विधिवत पौराहित्य केले. गुरू हैबतबाबांच्या पायरीला दूध, दही, मध, साखर, तूप, अत्तराचे शिंपण, हारतुरे, पेढे अर्पण करत पालखी सोहळा मालक बाळासाहेब पवार आणि कुटूंबियांच्या हस्ते पायरीचे पूजन करण्यात आले. महाद्वारातील विधिवत पूजेनंतर माउलींची आरती आणि पसायदान घेण्यात आले. त्यांनतर मंदिराला प्रदक्षिणा घालून माऊली मंदीरातील गुरू हैबतबाबांच्या ओवरीत आरती घेण्यात आली.
याप्रसंगी प्रमुख विश्वस्त योगेश देसाई, विश्वस्त अभय टिळक, विश्वस्त ॲड. विकास ढगे - पाटील, प्रांतधिकारी विक्रांत चव्हाण, मुख्याधिकारी अंकुश जाधव, वरीष्ठ पोलिस निरीक्षक ज्ञानेश्वर साबळे, थोरल्या पादुका देवस्थानचे अध्यक्ष ऍड. विष्णू तापकीर, माजी नगराध्यक्ष राहुल चिताळकर, सचिव अजित वडगावकर, माजी नगरसेवक डी.डी. भोसले, अध्यक्ष माऊली गुळुंजकर, व्यवस्थापक ज्ञानेश्वर वीर, पोलीस नाईक मच्छिंद्र शेंडे आदी मान्यवर उपस्थित होते.
सायंकाळी ह.भ.प. योगिराज ठाकूर आणि सायंकाळी ९ ते ११ बाबासाहेब आजरेकर यांची किर्तन सेवा झाली. गुरू हैबतबाबा पायरीसमोर रात्री १० ते पहाटे ४ पर्यंत ह.भ.प. वासकर महाराज, ह.भ.प. मारुतीबुवा कराडकर आणि ह.भ.प. हैबतबाबा आरफाळकर यांच्या वतीने जागर पार पडला. हैबतबाबा वंशज्यांच्या वतीने विश्वस्त मंडळ आणि माऊलींच्या मानकऱ्यांना नारळप्रसाद देण्यात आला. दरम्यान आळंदी शहरात भाविकांची गर्दी वाढत असून मंदिर परिसरात कडेकोट बंदोबस्त तैनात करण्यात आला आहे. सायंकाळी पंढरीहून पायी चालत आलेल्या संतांच्या दिंड्यांनी आळंदीत प्रवेश केला.
- पहाटे विधिवत दुधारती व महापूजा
- महाद्वारात आकर्षक फुलांची सजावट.
- श्री. संत ज्ञानेश्वर महाराज, श्री. गुरु हैबतबाबा यांच्या आकर्षक फुलांनी सजवल्या प्रतिमा.
- वारकऱ्यांच्या उपस्थितीत हरिनामाचा गजर