पुणे : मास्क न वापरल्यामुळे पोलिसांनी केलेल्या कारवाईला विरोध करीत एकाने अंगावर पेट्रोल ओतून आत्महत्येचा प्रयत्न केला. ही घटना स्वारगेट येथील जेधे चौकात घडली.
याप्रकरणी गणेश अंकुश मोरे (वय ३८, रा. शंकर महाराज वसाहत, धनकवडी) याला अटक केली. याबाबत पोलीस शिपाई सलमान मुल्ला याने स्वारगेट पोलीस ठाण्यात फिर्याद दिली आहे. जेधे चौकात गुरूवारी रात्री ११.३० च्या सुमारास पोलिसांचे पथक गस्त घालत होते. डायमंड हॉटेलजवळ मोरे मास्क परिधान न करता थांबला होता. पोलिसांनी त्याच्यावर मास्क न लावल्याबद्दल कारवाई केली. त्याने कारवाईला विरोध करून पोलिसांना धक्काबुक्की तसेच शिवीगाळ केली. त्यानंतर त्याने गाडीतील पेट्रोल स्वत:च्या अंगावर ओतून आत्महत्येचा प्रयत्न केला. सहायक पोलीस निरीक्षक शबनम शेख तपास करत आहेत.