पुणे : दक्षिण आफ्रिकेमध्ये आढळलेल्या कोरोना विषाणूच्या ओमायक्रॉन व्हेरिएंटने आता जिल्ह्यात प्रवेश केला आहे. यामुळे प्रशासन सज्ज झाले आहे. सतर्कतेचा उपाय म्हणून लसीकरणाला प्राधान्य दिले जाणार असून, नागरिकांनी लवकरात लवकर आपले लसीकरण पूर्ण करून घ्यावे, असे आवाहन मुख्य कार्यकारी अधिकारी आयुष प्रसाद यांनी केली आहे. जिल्ह्यात लसीकरण पूर्ण करण्यासाठी ‘घर घर दस्तक’ मोहिमेला मुदतवाढ देण्यात आली आहे. मास्क आणि शारीरिक नियमांचे पालन करण्याचे आवाहनही करण्यात आले आहे.
जिल्ह्याच्या वेशीबाहेर असलेला कोरोनाचा नवा व्हेरिअंट हा जिल्ह्यातही येऊन धडकला आहे. रविवारी जिल्ह्यात ७ रुग्ण आढळले. हा विषाणू नवा असला तरी घाबरून जाण्याचे कारण नाही, असे प्रशासनाने स्पष्ट केले आहे. या विषाणूविरोधात लढण्यासाठी लसीकरण गरजेचे असून, नागरिकांनी दोन्ही डोस प्राधान्याने पूर्ण करुन घ्यावे, असे आवाहन करण्यात आले आहे. प्राथमिक उपाय म्हणून सार्वजनिक ठिकाणी मास्क लावणे बंधनकारक आहे. त्याचबरोबर शारीरिक अंतराचे पालन करणे गरजेचे आहे. त्यासोबतच हाताचे निर्जंतुकीकरण करणे महत्त्वाचे आहे. हा विषाणू नवा असला तरी घाबरून जाण्याचे कारण नाही. शासकीय नियमावलीचे पालन केल्यास या विषाणूपासून दूर राहता येते, अशा सूचना आरोग्य विभागातर्फे करण्यात आल्या आहेत. जिल्ह्यात लसीकरण पूर्ण करण्यासाठी प्राधान्याने प्रयत्न केले जात आहेत. आतापर्यंत ३४ लाख ४ हजार ८०१ नागरिकांनी पहिला डोस घेतला आहे. तर १४ लाख ३१ हजार ४९८ जणांनी दोन्ही डोस घेतले आहे. हर घर मोहिमेला ३१ डिसेंबरपर्यंत मुदतवाढ देण्यात आली आहे. यासाठी २ हजार ४१० जणांचे पथक जिल्ह्यात अहोरात्र झटत आहे. घरोघरी जाऊन हे पथक लसीकरणासाठी जनजागृती करत असून, लसीकरणापासून वंचित राहिलेल्यांचे लसीकरण पूर्ण करुन घेत आहेत. ग्रामीण भागात २९५ केंद्रांवर लसीकरण केले जात आहे.
पहिला डोस दोन्ही डोस
हेल्थकेअर वर्कर- १,६२५७४ १,४१,०९०
फ्रंटलाइन वर्कर- २,६९,२७३ २,३३,२१०
१८ ते ४४ वयोगट- ४७,९५,१३६ २५,३६,४७३
४५ ते ५९ वयोगट -१६,२४, ६९४ ११, ५४,१७४
६० पेक्षा जास्त- १२,०४,३३५ ९,१०,१७२
तालुकानिहाय झालेले लसीकरण
तालुका पहिला डोस दुसरा डाेस
हवेली ६२५२०९ ४९२०५८
खेड ३५१६२४ १७६६४०
शिरूर ३०६३०५ १५४०२१
मावळ २९८४४९ १३४९४३
जुन्नर २६८८०८ १३६४२०
बारामती २५९८९१ १३६७५६
इंदापूर २३५३५२ ९६८४३
दौंड २२७८६३ ११३८५२
मुळशी २१८१८४ १५६७१५
आंबेगाव १७८१८९ ९४८३८
पुरंदर १५३९७८ ७४६२७
भोर ९८२१३ ५०७२०
वेल्हा ४४०५४ २३०७६
जिल्ह्यात आलेल्या ओमॅक्राॅन विषाणूपासून दूर राहण्यासाठी लसीकरण महत्त्वाचे आहे. नागरिकांनी स्वत:हून पुढे येत लसीकरण करणे गरजेचे आहे. लसीकरण पूर्ण करण्यासाठी ३१ डिसेंबरपर्यंत हरघर दस्तक मोहिमेची मुदत वाढवण्यात आली आहे.
-आयुष प्रसाद, मुख्य कार्यकारी अधिकारी