पुणे : कोरोनाची दुसरी लाट ओसरत असल्याचे चित्र निर्माण होत असतानाच हळूहळू पुन्हा कोरोना रुग्णांची संख्या वाढू लागली आहे. त्यामुळे अधिक काळजी घेण्याची आवश्यकता निर्माण झाली आहे. मागील आठवड्यात कोरोना रुग्णांचा दैनंदिन आकडा सरासरी २५० ते ३०० च्या दरम्यान आहे. हा आकडा जुन महिन्याच्या शेवटच्या आठवड्याच्या तुलनेत वाढल्याचे दिसत आहे.
कोरोनाची पहिली लाट साधारणपणे आॅक्टोबरच्या शेवटच्या आठवड्यात ओसरण्यास सुरुवात झाली. त्यानंतर पुन्हा फेब्रुवारीच्या दुस-या आठवड्यापासून रुग्ण वाढण्यास सुरुवात झाली. पहिल्या लाटेच्या तुलनेत या लाटेत रुग्ण मोठ्या प्रमाणावर वाढले होते. मोठ्या प्रमाणावर खाटा आणि रुग्णालयांमधील व्यवस्था वाढविण्यात आल्यानंतरही रुग्णालयात खाटा कमी पडू लागल्या होत्या. यासोबतच आॅक्सिजन आणि व्हेंटिलेटर खाटा मिळत नव्हत्या. आॅक्सिजनचाही पुरवठा पुरेशा प्रमाणात होत नसल्याने अडचणी निर्माण झाल्या होत्या.
एप्रिल आणि मे महिन्यात मोठ्या प्रमाणात रुग्ण वाढले होते. सर्वाधिक मृत्यूही याच काळात झाले. ही लाट जून महिन्यात ओसरण्यास सुरुवात झाली. त्यानंतर राज्य शासनाने राज्यातील कोरोना परिस्थितीचा आढावा घेऊन निर्बंध शिथील केले होते. हॉटेल रेस्टॉरंट बार यांना रात्री दहा वाजेपर्यंत मुभा देण्यात आली होती. तर, दुकानांना रात्री आठपर्यंत परवानगी देण्यात आली होती. नागरिकांची होत असलेली गर्दी, अद्यापही नियमांचे गांभिर्याने न होणारे पालन, मास्क वापरण्याकडे होत असलेले दुर्लक्ष यामुळे प्रशासन हतबल झाले आहे. रुग्ण वाढ होऊ लागल्यानंतर पुन्हा आढावा घेऊन वेळा पुन्हा कमी करण्यात आल्या. मागील दोन आठवड्यांपासून रुग्णसंख्या हळूहळू वाढत आहे. त्यामुळे प्रशासनाकडून चिंता व्यक्त केली जाऊ लागली आहे.
====
तारीख बाधित बरे झालेले मृत्यू
०२ जुलै । २६९ । २२० । ०५
०३ जुलै । ३४४ । २८३ । ०७
०४ जुलै । ३१६ । ३२९ । ०६
०५ जुलै १५० । २४९ । ०५
०६ जुलै २६८ । २२६ । ०५
०७ जुलै ४३२ । २७१ । ०६
०८ जुलै ३३१ । २५३ । ०८
०९ जुलै ३१४ । २३१ । ०७
१० जुलै ३२० । ३०२ । ०५
====
मागील पाच आठवड्यातील स्थिती
आठवडा बाधित तपासण्या टक्केवारी
४-१० जून । २, ०७१ । ४२,९८६ । ४.८२
११-१७ जून । १, ७९७ । ३७,४०१ । ४.८५
१८-२४ जून । १, ७२९ । ३६,०५८ । ४.७७
२५ जून -०१ जुलै । १, ९७७ । ३९,६५४ । ४.८९
०२-०८ जुलै । २, ११० । ४१,५९६ । ५.००