लोकमत न्यूज नेटवर्क
मंचर: तू मंचरचा भाई झाला आहे का? असे म्हणून गिरीश जगन्नाथ थोरात यांना शिवीगाळ करून दोघांनी दगडाने मारहाण केली. ही घटना गोसावीबाबा मंदिरात सेामवारी घडली. या प्रकरणी दोघांविरोधात गुन्हा दाखल झाला आहे.
गिरीश जगन्नाथ थोरात यांनी मंचर पोलीस ठाण्यात तक्रार दाखल केली आहे. याबाबत मंचर पोलिसांनी दिलेल्या माहितीनुसार गिरीश जगन्नाथ थोरात देवाच्या दर्शनासाठी टेकडीवर गेले असता राण्या बाणखेले व त्याचा मित्र तुषार मोरडे हे तेथे आले. दोघेही थोरात यांच्या ओळखी आहेत. तू मंचरचा भाई झाला आहे काय ? असे म्हणत त्याला शिवीगाळ करण्यास सुरुवात केली. थोरात याने शिवीगाळ करू नको असे म्हणताच तुषार पुढे येत त्यांच्या अंगावर हातात दगड घेऊन पाठीवर व पायावर मारून दुखापत केली आहे. ही घटना होत असताना थोरात यांचा मित्र रमेश गोविंद शेंगाळे याने तेथे येऊन त्याला सोडविले असता त्यालाही लाथाबुक्क्यांनी मारहाण केली. आम्ही मंचरचे भाई आहे, तू येथे धंदा कसा करतो ते बघच अशी धमकी दिली. याबाबत मंचर पोलिसांनी फिर्याद दाखल केली आहे, पुढील तपास पोलीस राजेंद्र हिले करत आहेत.