पुणे : योगासन हे आपल्या शारीरिक आरोग्यासाठी उत्तम व्यायाम आहे असे म्हणतात. पण काहीवेळा योगामध्येही नावीन्य हवे असे वाट्ते.हाच विचार करत पुण्यातील 'फिटनेस फ्रीक' या ग्रुपने योगाला नृत्याचा तडका देत योगानृत्य तयार केले आहे. संगीताच्या मदतीने योगासने करण्याची संकल्पना अमलात आणण्यासाठी या ग्रुपने विशेष प्रयत्न केले आहेत.
फिटनेस फ्रीक ग्रुपच्या अध्यक्षा वैशाली नाफडे या नृत्यदिग्दर्शिका असून त्यांना मदत म्हणून शिकवण्याची सर्व जबाबदारी राधिका फडके घेतात. या ग्रुपमध्ये वीस स्त्री सदस्य असून सर्व वयाने चाळीशी यापेक्षा पुढे आहेत. पंतप्रधान नरेंद्र मोदींनी आंतरराष्ट्रीय योगा दिवस साजरा करण्यास सुरुवात केल्यानंतर फिटनेस फ्रीक ग्रुपने हे पाऊल उचलले. जवळपास एक वर्षांपासून हा ग्रुप निरनिराळ्या प्रकारचे योगा नृत्य सादर करत आहे. उष्टसन, सूर्यनमस्कार, प्रार्थनासन, विरासन, योगमुद्रासन, गोरक्षासन, स्वस्तिकासन, वज्रासन यातून योगा नृत्य दाखवले जाते. तसेच या नृत्यप्रकारात वेस्टर्न गाणी आणि त्यावर कथक अथवा गरबा नृत्य सादर केले जाते.याच बरोबर पार्टनर योगा हा दोन व्यक्तींनी एकत्रित करायचे नृत्यही विकसित करण्यात आले आहे. या प्रकारात विशेषतः उठाबशा काढण्याचा व्यायाम केला जातो. वयाची चाळीशी, पन्नाशी उलटल्यावर स्त्रियांना हे करणे अवघड होते.अशा वेळी एकमेकींच्या साहाय्याने हा नृत्यप्रकार केला जातो.एकाच पद्धतीने योगा करण्याचा कंटाळा येत असेल तर हा एक उत्तम पर्याय असल्याचे मत नृत्यदिग्दर्शिका नाफडे यांनी व्यक्त केले.
योगा नृत्याची संकल्पना समाजासमोर मांडून लहान मुले तसेच तरुण वर्ग यात जास्तीत जास्त सहभागी होईल असा प्रयत्न करणार असल्याचे त्यांनी सांगितले.या योगामुळे दिवसभर ऊर्जा असल्यासारखे वाटते, प्रसन्नतेचा अनुभव येत असल्याचे राधिका फडके यांनी सांगितले.शबनम चावक यांनी योगा नृत्य करताना आनंद वाटत असल्याची भावना व्यक्त केली. वेगवान नृत्य करणे शक्य नसेल तर हा पर्याय जरूर अनुभवावा अशी शिफारसही त्यांनी केली.