लोकमत न्यूज नेटवर्क
पुणे : ‘मी खूप हतबल झाली आहे. हे प्रकरण कसे हाताळावे कळत नाहीये. माझ्यासमोर दुसरा कुठलाच पर्याय नसल्याने मी तुमचे लक्ष वेधण्यासाठी हा व्हिडिओ करीत आहे, असे सांगत उद्योजक नानासाहेब गायकवाड यांची नात आणि त्यांची मुलगी सोनाली व दीपक गवारे यांची १९ वर्षीय मुलगी राजेश्वरी हिने आई-वडिलांच्या अटकेनंतर सोशल मीडियावर व्हिडिओ टाकला.
दि. १३ जूनला माझ्या कुटुंबावर कौटुंबिक हिंसाचारासह खोट्या केसेस दाखल करण्यात आल्या आहेत. माझे सर्व कुटुंब निष्पाप असून, कुटुंबातील सदस्यांवर अन्याय केला जात आहे. माझे आई वडील दीपक आणि सोनाली गवारे यांना पोलीस अटक करून घेऊन गेले आहेत. चंदननगर पोलीस स्टेशनमध्ये त्यांना चौकशीसाठी बोलावले होते. मात्र पोलिसांनी सापळा रचून त्यांना चतु:श्रृंगी पोलीस स्टेशनमध्ये नेले आणि कोणतीही पूर्वकल्पना न देता त्यांना अटक केली. माझ्या छोट्या भावा-बहिणींची जबाबदारी माझ्यावर आली आहे. माझ्यासमोर दुसरा कुठलाच पर्याय उरला नसल्याने मी मदतीसाठी हा व्हिडिओ तयार केला आहे.आम्ही पोलीस, न्यायालय यांच्याशी संपर्क केला आहे. पण कोणतीच मदत मिळालेली नाही. हा व्हिडिओ अधिकाधिक सर्वापर्यंत पोहोचवावा, असे आवाहन तिने या व्हिडिओमध्ये केले आहे.
----------------------------