जेजुरीच्या नगराध्यक्षपदी ज्ञानेश्वरी बारभाई ?

येत्या ८ जुलै रोजी होणाऱ्या जेजुरी नगरपालिकेच्या नगराध्यक्ष पदाच्या निवडणुकीसाठी नगरसेविका ज्ञानेश्वरी बारभाई यांचाच एकमेव उमेदवारी अर्ज दाखल झाला आहे.

जेजुरी : येत्या ८ जुलै रोजी होणाऱ्या जेजुरी नगरपालिकेच्या नगराध्यक्ष पदाच्या निवडणुकीसाठी नगरसेविका ज्ञानेश्वरी बारभाई यांचाच एकमेव उमेदवारी अर्ज दाखल झाला आहे. यामुळे त्यांची निवड निश्चित मानली जात आहे. केवळ घोषणा होणे बाकी आहे.दि. २ ते ४ जुलै दरम्यान नगराध्यक्षपदासाठी उमेदवारी अर्ज दाखल करण्याची मुदत आहे. दि. ७ रोजी उमेदवारी अर्ज मागे घेता येणार आहे. दि. ८ जुलै रोजी पीठासन अधिकारी समीर शिंगटे यांच्या अध्यक्षतेखाली नगराध्यक्षपदाची निवडणूक होणार आहे. याच दिवशी उपाध्यक्ष पदाचीही निवडणूक होणार आहे. नगराध्यक्षपदासाठी उमेदवारी अर्ज दाखल करण्याची शनिवारी शेवटचा दिवस असल्याने या पदासाठी राष्ट्रवादी कॉंग्रेसच्या नगरसेविका ज्ञानेश्वरी बारभाई यांनी ज्येष्ठ नेते दिलीप बारभाई, प्रभारी नगराध्यक्षा साधना दरेकर, प्रभारी उपनगराध्यक्ष गणेश आगलावे, नगरसेवक लाला अण्णा जगताप, नगरसेविका अमृता घोणे, साधना दीडभाई, संगीता जोशी, सोनाली मोरे, सुरेखा सोनवणे यांच्या उपस्थितीत आज उमेदवारी अर्ज भरला. मुख्याधिकारी समीर भूमकर यांनी तो स्वीकारला. जेजुरी नगरपालिकेत राष्ट्रवादी कॉंग्रेसचे वर्चस्व असून येत्या ८ जुलै रोजी बारभाई यांची निवड निश्चित मानली जात आहे. यानंतर याच दिवशी पालिकेतील ज्येष्ठ नगरसेवक लाला अण्णा जगताप यांना उपनगराध्यक्षपदाची संधी मिळणार असल्याची चर्चा पालिका वर्तुळात आहे. (वार्ताहर)