पुणे, दि. 21 - नाल्यामध्ये साफसफाई करीत असताना जेसीबीमुळे महापारेषणची 132 केव्हीची भूमिगत वीजवाहिनी तुटल्याची घटना बुधवारी दत्तवाडीतील फरशी पुलाजवळ घडली. त्यामुळे जीआयएस तसेच महावितरणच्या सहा उपकेंद्रांचा वीजपुरवठा गुरुवारी दुपारी अडीचच्या सुमारास खंडीत झाला होता. त्यामुळे शहरातील शनिवार, नारायण, सदाशिव, कसबा, बुधवार, रविवार, शुक्रवार, मंगळवार, सोमवार, भवानी आणि नवी पेठेसह लुल्लानगर, कोंढवा, मुकुंदनगर, गुलटेकडी, लक्ष्मी रोड, सिंहगड रोड, कॅम्प, मार्केट यार्ड, स्वारगेट या भागातील वीज पुरवठा बंद पडला. या ढिसाळ कारभाराचा फटका तब्बल अडीच लाख नागरिकांना बसला असून याभागांमध्ये पुढील दोन दिवस चक्राकार पद्धतीने 3 ते 4 तासांचे भारनियमन करण्यात येणार आहे.महापारेषणच्या पर्वती 220 उपकेंद्रामधून भूमिगत वीजवाहिनीद्वारे रास्ता पेठ 132 केव्ही जीआयएस उपकेंद्राला वीज पुरवठा केला जातो. या उपकेंद्रातील वाहिन्यांद्वारे महावितरणच्या सेंटमेरी, कसबा पेठ, मंडई, लुल्लानगर, गुलटेकडी व रास्तापेठ या सहा उपकेंद्रांना वीजपुरवठा करण्यात येतो. फरशी पुलाजवळील नाल्यामध्ये जेसीबीच्या सहाय्याने कचरा साफ करण्याचे काम सुरु होते. त्यासाठी सिमेंटचे कॉंक्रीट उखडण्यात आले. त्यामुळे भूमिगत वाहिन्यांचे नुकसान झाले. रात्रभर सुरु असलेल्या पावसामुळे वाहिनीमध्ये आर्द्रता वाढल्याने गुरुवारी दुपारी या वाहिनीचा स्फोट झाला. त्यानंतर रास्ता पेठ केंद्राचा वीजपुरवठा बंद पडला. या केंद्रावर अवलंबून असलेल्या अन्य सहा केंद्रांवर त्याचा परिणाम झाला. त्यामुळे 70 ते 80 मेगावॅट विजेचे भारव्यवस्थापन करुन या भागातील ग्राहकांना वीज पुरविण्याचे प्रयत्न महावितरणने सुरु केले. अन्य उपकेंद्रांमधून पर्यायी व्यवस्था करण्यासाठीही प्रयत्न सुरु करण्यात आले आहेत. दरम्यान, काही भागात नाईलाजास्तव चक्राकार पद्धतीचे भारनियमन सुरु करण्यात आल्याचे महावितरणने कळविले आहे. या वाहिनीच्या दुरुस्तीसाठी तसेच बंद पडलेल्या उपकेंद्रांचा वीज पुरवठा सुरु होण्यास दोन दिवस लागणार आहेत. ग्राहकांनी वीजेचा वापर आवश्यकतेनुसार करावा तसेच उद्योग किंवा व्यावसायिकांनी विजेऐवजी शक्य असल्यास जनरेटरचा वापर करावा असे आवाहन महावितरणने केले आहे. खोदकामात नादुरुस्त झालेली महापारेषणची वीजवाहिनी विशिष्ट प्रकारची आहे. वाहिनीच्या दुरुस्तीसाठी आवश्यक असणारा जाईंट चेन्नई येथून विमानाने मागविण्यात आला आहे. शुक्रवारी या वाहिनीच्या दुरुस्तीचे काम महापारेषणकडून सुरु होणार असल्याचे सांगण्यात आले.या भागाला बसला फटकाशहराच्या मध्यवस्तीमधील रास्ता पेठ, कसबा पेठ, भवानी पेठ, बुधवार पेठ, नवीपेठ, सदाशिव पेठ, गंजपेठ, सोमवार पेठ, मंगळवार पेठ, गुरुवार पेठ, शुक्रवार पेठ, शनवार पेठ, नारायण पेठ, लुल्लानगर, कोंढवा, कॅम्प, गुलटेकडी, मंडई, मुकुंदनगर, लक्ष्मी रोड, सिंहगड रोड, रहेजा गार्डन, सॅलीसबरी पार्क, गुलटेकडी, महर्षी नगर, मुकुंदनगर, मार्केट यार्ड, शंकरसेठ रोड, स्वारगेट, जिल्हाधिकारी कार्यालयाचा काही परिसर, पर्वती आदी परिसरातीला वीज वाहिनी तुटल्याचा फटका बसला.
पुण्यात नाल्यामध्ये स्वच्छता सुरु असताना जेसीबीमुळे वीज वाहिनी तुटली, निम्म्या शहराची वीज गायब
By ऑनलाइन लोकमत | Updated: September 21, 2017 21:09 IST