भिगवण (पुणे) :भिगवण बाजारपेठेतील व्यावसायिकाने राहत्या घरी वायरच्या साहाय्याने गळफास घेत जीवन संपविल्याची धक्कादायक घटना दुपारच्या सुमारास घडली. आर्थिक विवंचना, सावकारी त्रासामुळे आत्महत्या केली की घरगुती काही कारणांमुळे याचा उलगडा झालेला नाही. शैलेश धरमचंद ओसवाल (रा.राही, अंगण बिल्डिंग, भिगवण) असे गळफास घेत आत्महत्या केलेल्या व्यावसायिकाचे नाव आहे. याबाबत मयत शैलेश यांच्या पत्नी मेघना ओसवाल यांनी भिगवण पोलिस ठाण्यात खबर दिली आहे.
शैलेश ओसवाल बुधवारी नियमित पणे कामकाज करीत असताना एका भिशी ठिकाणी भिशीचा लिलाव बोलून घरी गेले असताना त्यांनी हे टोकाचे पाऊल उचलले. याबाबत बाजारपेठेत उलट सुलट चर्चा केली जात होती. मात्र, त्यांच्या आत्महत्येबाबत कोणतेही कारण समोर आलेले नाही. ओसवाल यांच्या या आत्महत्येमुळे भिगवण बाजारपेठेवर शोककळा पसरल्याचे दिसून आले. भिगवण पोलिसांनी पंचनामा करीत त्यांचे पार्थिव इंदापूर येथे शवविच्छेदन करण्यासाठी पाठविले. याचा तपास पोलिस उपनिरीक्षक रूपेश कदम करीत आहेत.
याबाबत भिगवण पोलिस ठाण्याचे प्रभारी अधिकारी दिलीप पवार यांनी भिगवण बाजारपेठेतील व्यावसायिकाने जीव दिल्याची घटना अतिशय दुःखद असून ओसवाल यांच्या नातेवाइकांनी तक्रार केल्यास पुढील तपास योग्य पद्धतीने होणार असल्याचे सांगितले. तसेच, त्यांच्या काही डायऱ्या पोलिसांनी हस्तगत केल्या असून पुढील तपास सुरू असल्याचे सांगितले.