लोकमत न्यूज नेटवर्क
पुणे : कोरोना रुग्णांची संख्या जसजशी वाढत गेली तसतसा वाढत गेलेला जैववैद्यकीय कचरा रुग्ण कमी होताच घटला आहे. सप्टेंबर सात टनांवर असलेला कचरा डिसेंबरमध्ये अडीच टनांवर आला आहे. कोरोना रुग्णांची कमी झाल्यानंतर अन्य रुग्णांची संख्या वाढून लागली आहे. त्यामुळे कोरोना व्यतिरीक्त अन्य रुग्णांचा जैववैद्यकीय कचराही वाढू लागला आहे.
विविध आजारांच्या रुग्णांवरील उपचारांमधून निर्माण होणाऱ्या कचऱ्यासह पीपीई किट्स, जेवणाची ताटे व अन्य साहित्य असा सात ते आठ टन कचरा दिवसाकाठी निर्माण होत होता. महापालिकेने खासगी कंपनीसोबत जैविक कचऱ्याच्या प्रक्रियेबाबत करार केला आहे. डॉ. नायडू रुग्णालयाजवळील कैलास स्मशानभूमीजवळ असलेल्या या कंपनीमधील इन्सिनरेटमध्ये हा कचरा जाळला जात आहे. अतिरीक्त आलेला कचरा तळोजा, बारामती आणि सातारा येथे पाठविला जात आहे.
पुण्यातील प्रकल्पाची क्षमता चार हजार किलो कच-यावर विल्हेवाटीची आहे. आता कोरोनावरील कचरा कमी झाल्याने याच ठिकाणी विल्हेवाट लावली जात आहे.
====
कशी केली जाते वाहतूक?
हा कचरा बंदिस्त वाहनांमधून वाहून नेला जातो. त्याची पूर्णत: सुरक्षितपणे आणि वैज्ञानिकदृष्ट्या विल्हेवाट लावली जाते. हा बंदिस्त बॅगांमध्ये भरला जातो. या बँगांचे चार ते पाच वेळा निर्जंतुकीकरण केले जाते.
====
शहरातील कोरोना रुग्णांचा कचरा कमी झाला आहे. यासोबतच अन्य रुग्णांचा कचरा मात्र वाढला आहे. याचा अर्थ कोरोना व्यतिरीक्त अन्य आजारांच्या रुग्णांवरील उपचार सुरु झालेले आहेत. डबल बॅगमध्ये हा कचरा भरला जातो. त्याचे निर्जंतुकीकरण केले जाते. पीपीई किट घालूनच हा कचरा हाताळला जात असून इन्सिनरेटरमध्ये जाळला जातो.
- डॉ. मनिषा नाईक, सहायक आरोग्य अधिकारी, पुणे महापालिका
====
कोरोना काळातील जैववैद्यकीय कच-याची स्थिती
महिना कोरोनाचा कचरा अन्य जैविक कचरा एकूण वैद्यकीय कचरा
जुलै ४,९५४ ४,५०५ ९,४५९
ऑगस्ट ५०७१ ३१३९ ८,२१०
सप्टेंबर ६,९६० ६,५६० १३,५२०
ऑक्टोबर ५,२६२ ५,६२९ १०,८९१
नोव्हेंबर २,१९७ ५,२८५ ७,४८२
डिसेंबर २,५१८ ६,०१८ ८,५३६