एटीएसकडून पुण्यात आणखी शस्त्रसाठा जप्त, नालासोपारा, पुण्यात पुन्हा छापे  

हिंदुत्ववादी संघटनेच्या वैभव राऊत, शरद कळसकर आणि सुधन्वा गोंधळेकर यांच्या कसून चौकशीनंतर एटीएसने नालासोपारा आणि पुण्यामध्ये छापे मारले.

मुंबई - हिंदुत्ववादी संघटनेच्या वैभव राऊत, शरद कळसकर आणि सुधन्वा गोंधळेकर यांच्या कसून चौकशीनंतर एटीएसने नालासोपारा आणि पुण्यामध्ये छापे मारले. त्यात शस्त्रास्त्रे आणि स्फोटकांच्या वाहतुकीसाठी वापरलेली कार व मोटारसायकलसह आणखी शस्त्रसाठा, महत्त्वाची कागदपत्रे जप्त केली आहेत.राऊत याच्या घर आणि दुकानात गुरुवारी छापा टाकून एटीएसने शस्त्रसाठा जप्त केला. एटीएसने रविवारी पुन्हा छापे मारून नालासोपाऱ्यातून ५ गावठी पिस्तुलांसह ३ अर्धवट बनावट पिस्तुले, ९ मि.मी.ची ११ काडतुसे, ७.५ मि.मी.ची ३० काडतुसे आणि शस्त्रांस्त्रांचे सुटे भाग हस्तगत केले.एटीएसने पुण्यात छापे मारून शस्त्रास्त्रे आणि स्फोटकांच्या वाहतुकीसाठी वापरलेली कार व मोटारसायकल जप्त केली. लॅपटॉप ६ हार्डडिस्क, ५ पेनड्राइव्ह, ९ मोबाइल, सिमकार्ड्स, वायफाय डोंगल आणि कागदपत्रे जप्त केली आहेत. संशयित म्हणून ताब्यात घेतलेल्या १३ जणांची कसून चौकशी सुरू आहे.