लासुर्णे : स्पर्धेच्या युगात प्रत्येकजण सतत प्रगतीच्या दिशेने धावपळ करत आहे. ज्यांनी जन्माला घातले, वाढवले, शिकवले त्या आई वडिलांकडे लक्ष देण्यासाठी अनेकांकडे वेळ नाही, हे दुर्दैव आहे. यासाठी बेलवाडी (ता. इंदापूर) येथे भव्य वृद्धाश्रम उभारणार आहे, असे नेचर डेअरीचे अध्यक्ष अर्जुन देसाई यांनी सांगितले.
लासुर्णे (ता. इंदापूर) येथील सुधीर लोदाडे मेमोरियल ट्रस्टच्या वतीने बलिप्रतिपदानिमित्त रुग्ण दैवत पुरस्कार व ज्येष्ठ नागरिकांचा सन्मान सोहळा आयोजिला होता, यावेळी देसाई बोलत होते. यावेळी रुग्णसेवा करीत असलेले डॉ. पी. एन. देवकाते यांना रुग्ण दैवत गौरवचिन्ह देऊन गौरविण्यात आले. तसेच ज्येष्ठ नागरिकांना शाल, फेटा व पुष्पगुच्छ देऊन त्यांचा सन्मान करण्यात आला. यावेळी बाळासाहेब घोलप, पंचायत समिती सदस्य अ‍ॅड. हेमंत नरूटे, मनोहर ठोंबरे, पोलीस निरीक्षक एम. डी. निंबाळकर, डॉ. योगेश पाटील, डॉ. कमलाकर व्होरकाटे, डॉ. सुधीर कल्याणकर, डॉ. ज्योतिराम देसाई, डॉ. वायसे, गणेश फडतरे, ट्रस्टचे अध्यक्ष प्रा. डॉ. आनंद लोदाडे, प्रणव लोदाडे व सर्व सदस्य आदी उपस्थित होते.
प्रा. लोडाडे यांनी सांगितले, की वयाची साठी गाठल्यावर माणसाला खरी आधाराची गरज असते. परंतु, नेमके याच वयात सर्वजण ज्येष्ठांची हेळसांड करीत असतात. यासाठी या काळात कुणीतरी आदर करावा आपला सन्मान व्हावा, अशी इच्छा ज्येष्ठांची असते. हा उदात्त हेतू डोळ्यासमोर ठेवून सुधीर लोदाडे मेमोरियल ट्रस्ट गेल्या पाच वर्षांपासून असे उपक्रम राबवित आहे.