पुणे: भोसरी एमआयडीसी जमीन खरेदी प्रकरणी भाजपचे नेते एकनाथ खडसे यांना दिलासा मिळालाय. या प्रकरणाची चौकशी करणाऱ्या पुणे एसीबीनं क्लीन खडसेंना क्लीन चिट दिलीय. खडसे यांच्याकडून पदाचा गैरवापर झाला नाही आणि त्यामुळे शासनाचं कोणतंही नुकसान झालेले नाही, असं एसीबीनं अहवालात म्हटलंय. हा अहवाल एसीबीकडून पुणे कोर्टात सादर करण्यात आलाय. खडसेंविरोधातील कोणताही आरोप सिद्ध झालेला नाही, असंही या अहवालात एसीबीनं नमूद केलंय.
पुण्याच्या भोसरी एमआयडीसीतील जमीन कुटुंबीयांच्या नावे करण्यावरून एकनाथ खडसे यांची आयोग नेमून चौकशी करण्यात आली. हे प्रकरण समोर आल्यानं नैतिकतेच्या मुद्यावर खडसे यांचा राजीनामाही घेण्यात आला. चौकशी आयोगाचा अहवाल प्राप्त झाल्यावर लाचलुचपत प्रतिबंधक विभागाची चौकशी सुरू असल्यानं अहवाल निरर्थक ठरल्याचं सांगत मुख्यमंत्र्यांनी खडसे यांच्या अडचणींमध्ये वाढ केली. मात्र आता लाचलुचपत प्रतिबंधक विभागानं खडसेंना क्लीन चिट दिलीय. त्यामुळे आता खडसेंना मंत्रिमंडळात घेतलं जाणार का, याची चर्चा सुरू झाली.
भोसरी एमआयडीसीतील जमीन कुटुंबीयांच्या नावे करताना खडसेंनी मंत्रिपदाचा गैरवापर केल्याचा आरोप होता. याशिवाय त्यांच्या या निर्णयामुळे शासनाचं आर्थिक नुकसान झाल्याचाही आरोप करण्यात आला होता. मात्र हे आरोप सिद्घ होत नसल्याचं लाचलुचपत प्रतिबंधक विभागानं अहवालात म्हटलंय. हा अहवाल कोर्टात सादर करण्यात आलाय. त्यामुळे अज्ञातवासात गेलेल्या खडसेंना मोठा दिलासा मिळालाय. मंत्रीपद गेल्यामुळे नाराज असलेल्या खडसेंनी अनेकदा भाजपा सरकारवर टीकास्त्र सोडलं होतं. ते अनेकदा विरोधी पक्षातील नेत्यांच्या संपर्कात असल्याचंही दिसलं होतं.