सरासरीच्या १०७ टक्के पाऊस,
भिगवण, अंथुर्णे, लोणीदेवकर,
सणसर मंडळात पावसाची दडी
बारामती : इंदापूर तालुक्यात अद्यापही सर्वदूर पावसाची प्रतीक्षा कायम आहे. खरिपातील पिके फुलोऱ्या आली असून अडसाली ऊस लागवडी वाढीच्या अवस्थेत आहेत. सरासरीच्या १०७ टक्के पाऊस झाला असला, तरी भिगवण, लोणी देवकर, अंथुर्णे, सणसर आदी चार मंडळांमध्ये पावसाने दडी मारली आहे.
इंदापूर तालुका आवर्षन प्रवणक्षेत्रात येत असल्याने येथे दर वर्षी तुरळक ते मध्यम स्वरूपाचा पाऊस होतो. मात्र, मागील दोन वर्षांमध्ये पावसाने तालुक्यात विक्रमी नोंद केली आहे. यंदा देखील पाऊस चांगला होईल या अपेक्षेवर शेतकरी होते. मात्र बावडा, इंदापूर, निमगाव केतकी, काटी आदी मंडळ वगळता इतर ठिकाणी पावसाने ताण दिला आहे. इंदापूर तालुका जिल्ह्यात सर्वाधिक फळबागा लागवड असलेला तालुका म्हणून ओळखला जातो. तसेच तीन ऊस कारखान्यांचे कार्यक्षेत्र इंदापूर तालुक्यात असल्याने पावसाच्या गणितावर तसेच भीमा नदी परिसर, उजनी धरणक्षेत्र, नीर नदी क्षेत्र व नीरा डावा कालवाच्या ओलिताखालील क्षेत्रामध्ये अडसाली ऊस लागवडी केल्या जातात.
तालुक्याच्या जिरायती पट्ट्यामध्ये खरीप हंगामातील पिके मोठ्याप्रमाणात घेतली जातात. यंदाच्या वर्षी १२ हजार ४८४ हेक्टर क्षेत्रावर अन्नधान्याची पेरणी झाली आहे. तर २२ हजार ८३३ हेक्टर क्षेत्रावर ऊस उभा आहे. तसेच १२ हजार १३६ हेक्टर क्षेत्रावर फळपिकांच्या लागवडी केल्या आहेत. तसेच यंदाच्या वर्षी प्रथमच सोयबिन लागवड मोठ्याप्रमाणात झाली असून सरासरीच्या ४०२ टक्के क्षेत्रावर सोयाबिन लागवड झाली आहे. तालुक्यातील पीक परिस्थिती सध्यातरी चांगल्या अवस्थेत आहे. मका तुरे व कणीस लागण्याच्या अवस्थेत आहे. सोयाबीन फुले व शेंगा येण्याच्या अवस्थेत आहे.
तालुक्यातील प्रमुख पिके व
त्याखालील क्षेत्र (हेक्टरमध्ये)
बाजरी - ८४२
मका - १०,८२७
तेलबिया - ७४४
अडसाली ऊस - ९,६००
चारा पिके - ७,१८७
भाजीपाला - ४,७४८
फळबागा - १२,१२६
---------------------------
मंडल निहाय पावसाची टक्केवारी (जून ते ऑगस्ट)
भिगवण - १२३.३
इंदापूर - ११८.१
लोणी देवकर - ७२.२
बावडा - ११७.४
काटी - ११०.९
निमगाव केतकी - १३२.८
अंथुर्णे - ९३.०
सणसर - ८७.७
---------------------------
पावसाची स्थिती काही भागामध्ये समाधानकारक आहे, तर काही ठिकाणी पाऊस कमी असला तरी त्याचा पिकावर फारसा परिणाम झाला नाही. भिगवण व लोणीदेवकर मंडळामध्ये मात्र पावसाने मोठ्या विश्रांतीनंतर हजेरी लावली होती. तालुक्यातील पीकपरिस्थिती चांगली आहे.
- भाऊसाहेब रूपनवर
तालुका कृषी अधिकारी, इंदापूर
काझड परिसरात माळरानावर फुललेले बाजरीचे पीक सध्या या भागात पावसाची गरज असल्याचे शेतकऱ्यांनी सांगितले.