समाजकंटकाने शेतकऱ्यांची तब्बल १३०० डाळिंबाची झाडे तोडली;शेतकऱ्याचे मोठे आर्थिक नुकसान

- दीड वर्षांपूर्वी शेतकरी दिलीप थोरात व शहाजी थोरात यांनी लागवड केलेल्या भगवा जातीच्या डाळिंब पिकाला सध्याच्या हंगामात बहर लागलेला होता.

मलठण : शरदवाडी (ता. शिरूर) येथे अज्ञात समाजकंटकांद्वारे सुमारे तीन एकर क्षेत्रात असलेल्या डाळिंब बागेतील सुमारे १३०० झाडे तोडून नष्ट केल्याचा धक्कादायक प्रकार उघड झाला आहे. यासंबंधी परिसरातील शेतकऱ्यांनी संताप व्यक्त केला असून, अशाप्रकारचे नुकसान करणाऱ्या समाजकंटकांवर कडक कारवाई करण्याची मागणी केली आहे.

शेतकरी शहाजी निवृत्ती थोरात आणि दिलीप निवृत्ती थोरात यांनी आपले शेतात दीड वर्षांपूर्वी भगवा जातीच्या १३०० डाळिंब रोपांची अंदाजे तीन एकर क्षेत्रावर लागवड केली होती. लाखो रुपयांचे भांडवल गुंतवून डाळिंब पिकाचा बहर टिकवण्यात आला होता. सदर झाडांवर मोठ्या प्रमाणात फळे लागली होती आणि पुढील तीन महिन्यांत डाळिंब काढण्यायोग्य होणार होते. मात्र, शुक्रवारी मध्यरात्रीच्या सुमारास अज्ञात समाजकंटकांद्वारे सर्व १३०० झाडे तोडून टाकण्यात आली आहेत. या प्रकरणात शेतकरी थोरात यांना लाखो रुपयांचे नुकसान झाले असून, योग्य तपास करून या समाजकंटकांवर कडक कारवाई करावी, अशी मागणी शेतकरी थोरात व आसपासच्या शेतकरी वर्गाने केली आहे.

या घटनेमुळे शेतकऱ्यांमध्ये भीतीचे वातावरण निर्माण झाले आहे. दीड वर्षांपूर्वी शेतकरी दिलीप थोरात व शहाजी थोरात यांनी लागवड केलेल्या भगवा जातीच्या डाळिंब पिकाला सध्याच्या हंगामात बहर लागलेला होता. पुढील तीन महिन्यांत डाळिंब फळे काढण्यासाठी तयार होणाऱ्या पिकाला अशाप्रकारे समाजकंटकांकडून झालेल्या नुकसानीमुळे लागवडपासून आतापर्यंत खर्च केलेले भांडवल आणि धरलेल्या बहराचा विचार करता, अंदाजे २५ ते ३० लाख रुपयांचे नुकसान झाले असल्याचे त्यांनी सांगितले.

शेतकऱ्यांची सध्याची आर्थिक परिस्थिती दयनीय असून, सध्या कांदा पिकासह सर्व शेतमालांच्या भावात घट झाली आहे. त्यामुळे शेतकरी मेटाकुटीच्या स्थितीत आले आहेत. लाखो रुपयांचे गुंतविलेले भांडवलही उरायला शकत नाही, आणि अशाप्रकारे मोठे नुकसान झाल्यास शेतकऱ्यांची आर्थिक स्थिती उद्ध्वस्त होण्यास वेळ लागणार नाही. त्यामुळे चुकीच्या पद्धतीने नुकसान पोहोचविणाऱ्या समाजकंटकांवर कडक कारवाई करावी, अशी ग्रामीण भागातील शेतकऱ्यांनी मागणी केली आहे.