पुणे : जिल्ह्यात रविवारी झालेल्या १८६ ग्रामपंचायतींच्या सार्वत्रिक निवडणुकीसाठी तब्बल ८०.५२ टक्के मतदान झाले, तर जागा रिक्त झालेल्या ३१ ग्रामपंचायतींच्या पोटनिवडणुकीसाठीही भरघोस ७९.६८ टक्के मतदान झाले आहे. या सर्व उमेदवारांच्या भवितव्याचा फैसला अर्थात मतमोजणी सोमवारी (दि. ६) होणार आहे. सार्वत्रिक निवडणुकीत सर्वाधिक ८६ टक्के मतदान बारामती तालुक्यात झाले तर, सर्वांत कमी ७४ टक्के मतदान जुन्नर तालुक्यात झाले.
राज्य निवडणूक आयोगाने जानेवारी ते डिसेंबर या काळात मुदत संपणाऱ्या जिल्ह्यातील २३१ ग्रामपंचायतींसाठी निवडणूक जाहीर केली होती. तर १४२ ग्रामपंचायतींमधील रिक्त जागांसाठीही निवडणूक जाहीर करण्यात आली होती. निवडणूक प्रक्रियेनुसार २३१ ग्रामपंचायतींमधील २ हजार ४० सदस्य पदांसाठी निवडणूक होणार होती. माघारीच्या मुदतीनंतर एकच अर्ज आल्याने ८४९ सदस्यांची निवड बिनविरोध झाली आहे. त्यामुळे १८८ ग्रामपंचायतमधील १ हजार १३२ सदस्यांची निवड मतदानानंतर होणाऱ्या मतमोजणीतून निश्चित होणार आहे. तर, ४२ ग्रामपंचायतींमधील २०४ रिक्त जागांसाठी निवडणूक होणार होती. मात्र, १०६ ठिकाणी एकही अर्ज आला नसल्याने ही पदे पुन्हा रिक्त राहणार आहेत. तर ६३ सदस्यपदे बिनविरोध झाली आहेत. त्यामुळे ३१ ग्रामपंचायतींमधील ३५ सदस्यपदांसाठी रविवारी मतदान झाले.
ग्रामपंचायतीच्या सार्वत्रिक निवडणुकांसाठी जिल्ह्यातील तेरा तालुक्यांत २३१ पैकी १८६ ठिकाणच्या निवडणुकांसाठी ७०८ केंद्रांवर रविवारी मतदान झाले. त्यासाठी तीन लाख ७९ हजार ६१४ मतदारांनी मतदानाचा हक्क बजावला. पोट निवडणुकीसाठी १४२ पैकी ३१ ग्रामपंचायतींसाठी १९ हजार ६१३ मतदारांनी हक्क बजावला. बारामती तालुक्यात मात्र पोटनिवडणूक घेण्यात आली नाही, असे जिल्हा प्रशासनाकडून रात्री उशिरा सांगण्यात आले.
जिल्ह्यातील ग्रामपंचायतीच्या निवडणुकीतील मतदानाची टक्केवारी
तालुका....... सार्वत्रिक निवडणूक ............पोटनिवडणूक
वेल्हे ..........८२.२४ .....................७३.०७
भोर ..........८३.५० ...............८४.५६
पुरंदर .............८३.३०...........८६.५९
दौंड ..................७८.८६ .............८३.७०
आंबेगाव............७५.२८.............७६.०८
खेड .............. ८२.२४...............७५.०३
शिरूर ...............८०.९४..............८४.९८
मावळ ...............८६.१८ ................८८.०५
हवेली ...................८१.७६...........८१.०७
बारामती ..............७३.९६....... निवडणूक नाही
इंदापूर ............. ७८.७८........८५.४९
मुळशी ...........८२.१८........७५.४९
जुन्नर ................७३.९६........७२.४७
एकूण ......... ८०.५२........७९.२८