पुणे : आयपीओ घेऊन ट्रेडिंग केल्यास चांगला नफा मिळवण्याच्या नादात एकाला गंडवल्याचा प्रकार समोर आला आहे. याप्रकरणी मंगळवारी (दि. २६) खडक पोलीस ठाण्यात गुन्हा नोंदवण्यात आला आहे.
अधिक माहितीनुसार, सुमित रामदास अळसपुरे (वय- ३४, रा. गंजपेठ यांनी पोलीस ठाण्यात फिर्याद दिली आहे. त्यानुसार ही घटना २९ नोव्हेंबर ते १२ जानेवारी २०२४ या दरम्यानचा काळात घडली आहे. फिर्यादी हे इंस्टाग्रामवर सर्फिंग करत असताना त्यांनी एका अनोळखी लिंकवर क्लिक केले. त्यानंतर ते एका व्हाट्सअप ग्रुपमध्ये ऍड झाले. त्यामध्ये दररोज शेअर मार्केटविषयी माहिती दिली जात होती. गुंतवणूक केल्यास चांगले परतावा मिळतो असे भासवले जात होते. गुंवणुकीचे आमिष दाखवून त्यांना ट्रेडिंग करण्यासाठी क्लासेस घेतो असे सांगून एक ऍप डाऊनलोड करायला लावले. यात फिर्यादी यांनी तब्बल ५४ लाख ३४ हजार रुपयांची गुंतवणूक केली.
यानंतर त्यांच्या ऍपवर शेअर ट्रेडिंग मधून फायदा झाल्याचे दिसून येत होते. मात्र फिर्यादी यांना ते पैसे काढता येत नव्हते. यावेळी त्यांनी सायबर चोरट्याशी संपर्क केला तेव्हा वेळोवेळी आणखी पैसे भरण्यासाठी तगादा लावला जात होता. पैसे मिळणार नाही याची खात्री झाल्यावर त्यांनी खडक पोलीस ठाण्यात फिर्याद दिली आहे. त्यानुसार फानोळखी मोबाईल क्रमांक धारकाविरोधात गुन्हा दाखल करण्यात आला आहे. पुढील तपास पोलीस निरीक्षक राऊत हे करत आहेत.