लोकमत न्यूज नेटवर्क
पुणे : आई-वडील रागविले, मित्राने लग्नाचे आमिष दाखवले, चांगल्या नोकरीचे आमिष दाखविले, घरात मनाप्रमाणे वागू देत नाही, वडिलांकडून सतत मारहाण होते अशा वेगवेगळ्या कारणांमुळे अल्पवयीन मुले-मुली घरातून पळून जाण्याचे प्रमाण अधिक आहे. अशा पळून गेलेल्या लहान मुलांबाबत अपहरणाचा गुन्हा दाखल करुन पोलिसांकडून त्यांचा शोध घेतला जातो. पुणे शहरातून गेल्या वर्षी नोव्हेंबरअखेर ३६३ मुले-मुली पळून गेली होती. त्यापैकी २५२ जणांचा शोध घेण्यात पोलिसांना यश आले आहे.
अनेकदा मुले छोट्या छोट्या कारणांवरून रागात घर सोडून जातात. बरेचदा काही वेळाने त्यांचा राग शांत झाल्यावर ती घरी परत येतात. मात्र, अनेक जण घरी परत न देता इतरत्र काम करून घरी परतत नाही. यंदा पाेलिसांनी राबविलेल्या ऑपरेशन मुस्कानमध्ये १२ मुलांना शोधण्यात यश आले.
आईशी भांडल्याने सोडले घर...
पुणे रेल्वे स्टेशनवर एक १३ वर्षांची मुलगी एकटीच बसलेली पोलिसांना आढळून आली. त्यांनी चौकशी केल्यावर ती काहीच सांगत नव्हती. शेवटी महिला पोलिसांनी तिच्याशी गोड बोलून तिला सामाजिक सुरक्षा विभागात आणले. जेऊ घातले. त्यानंतर तिने घरातून निघून आल्याचे सांगितले. पण आईचा नंबर देण्यास तयार नव्हती. तुला कोण कोण भेटले, असे विचारले असताना पोलिसांच्या अगोदर तिला दोघे जण भेटले होते. त्यांनी मोबाईल नंबरही दिला होता. पण सुदैवाने ती त्यांच्या भुलथापांना बळी पडली नाही. शेवटी आईशी संपर्क साधून मुलीला त्यांच्या स्वाधीन केले.
......
लग्नाच्या आमिषाने पळविले
पश्चिम बंगालमधील एनजीओमार्फत अर्ज आला होता. लॉकडाऊनच्या काळात लोक घरात येऊन देत नसतानाही पोलिसांनी सतत दोन दिवस लोणी कंद परिसरात महापालिकेचे आरोग्य कर्मचारी असल्याचे भासवून या मुलीचा शोध घेतला. तेव्हा ती मुलगी सापडली. या मुलीला लग्नाचे आमिष दाखवून पळवून आणले होते. तिला तो वेश्याव्यवसायात बुधवार पेठेत विकायच्या तयारीत होता. तेथे तिला घेऊन जाऊन दाखवून आणले होते. पोलिसांनी वेळेत कारवाई केल्याने ती बचावली होती.
---
नशेमुळे आला होता पळून
पश्चिम बंगालमधील एक १४ वर्षांच्या मुलाला नशेची सवय लागली होती. त्यातून तो पुण्यात आला होता. पोलीस उरूळी कांचन येथे कारवाईला जात असताना त्यांना हा मुलगा आढळून आला. पोलिसांनी ससून रुग्णालयात त्याच्यावर उपचार केले. त्याचे वडील पुण्यात आल्यावर त्यांना गाडीखर्च देऊन मुलासह गावी परत पाठविले.
---
सामाजिक सुरक्षा विभागाने पोलीस उपायुक्त बच्चनसिंग यांच्या मार्गदर्शनाखाली पोलीस निरीक्षक अनघा देशपांडे, उपनिरीक्षक श्रीधर खडके व पोलीस कर्मचारी राजेंद्र कुमावत, राजश्री मोहिते, नीलम शिंदे, मनीषा पोकाळे, आश्विनी केकाण, रोहिणी जगताप, पुष्पेंद्र चव्हाण, शशांक खाडे, इरफान पठाण, हणमंत कांबळे यांनी ही कामगिरी केली.
२०१९, २०२० (नोव्हेंबरअखेर)
बेपत्ता मुले १८० ७५
बेपत्ता मुली ४६३ २८८
एकूण ७४३ ३६३
सापडले मुले १५६ ५८
सापडले मुली ३८४ १९४
एकूण सापडलेले ५४० २५२