मुंबई - मुख्यमंत्री उद्धव ठाकरे यांच्याविरोधात केलेले आक्षेपार्ह वक्तव्य केंद्रीय मंत्री नारायण राणे यांना चांगलेच भोवण्याची शक्यता आहे. नारायण राणे (Narayan Rane) यांच्याविरोधात विविध ठिकाणी गुन्हे दाखल झाले असून, त्यांना अटक करण्यासाठी पोलिसांचे पथक रवाना झाले आहे. दरम्यान, केंद्रीय मंत्रिपदावर असताना नारायण राणे यांना अटक होऊ शकते का? असा प्रश्नही उपस्थित होऊ लागला आहे. ( Can Narayan Rane be arrested while he is a Union Minister? What the law says)
नारायण राणे यांना अटक होऊ शकते का याबाबत कायदेतज्ज्ञांना विचारले असता त्यांनी नारायण राणे यांना अटक होऊ शकते, असे मत मांडले आहे. मात्र ते अटकपूर्व जामीन घेऊन ते अटक टाळू शकतात, असा मुद्दाही कायदेतज्ज्ञांनी मांडला आहे. मुख्यमंत्र्यांविरोधातील आक्षेपार्ह वक्तव्याप्रकरणी पोलिसांनी नारायण राणेंवर भादंवि कलम ५००, ५०५(२), १५३(ब) १ आणि (क) अशी कलमे लावली आहेत. दरम्यान, नारायण राणेंविरोधात लावलेले कलम ५०० हे चुकीचे आहे. ज्या व्यक्तीची बदनामी होते. तीच व्यक्ती अशा प्रकारची तक्रार करू शकते. येथे उद्धव ठाकरे यांनी तक्रार केली तरच हे कलम लागू शकते, असे कायदेतज्ज्ञ असीम सरोदे यांनी सांगितले.
राणेंविरोधात दाखल झालेला गुन्हा दखलपात्र असला तरी त्यांना अटकपूर्व जामीन मिळवण्याचा मार्ग मोकळा आहे. त्यामुळे पोलीस येण्यापूर्वी नारायण राणे अटकपूर्व जामीन मिळवू शकतात. यामध्ये त्यांना पोलिसांनी लावलेल्या कलम ५०० चा फायदा होऊ शकतो. त्याचं कारण म्हणजे एखादे चुकीचे कलम लावले गेले, तर इतर कलमांबाबतही संशय निर्माण होऊ शकतो, अशी माहितीही सरोदे यांनी दिली.
दरम्यान, दरम्यान, मुख्यमंत्री उद्धव ठाकरेंनी देशाच्या स्वातंत्र्य दिनाबद्दल बोलताना केलेल्या विधानाचा संदर्भ देत नारायण राणेंनी काल एक वादग्रस्त वक्तव्य केलं होतं. रायगडमध्ये नारायण राणेंनी हे चिथावणीखोर विधान केल्यानंतर महाड, नाशिकमध्ये गुन्ह्याची नोंद झाली होती. उद्धव ठाकरे हे मुख्यमंत्री आहेत. ते घटनात्मक पदावर आहेत. त्यामुळे त्यांच्याबद्दल केलेलं विधान हे संपूर्ण राज्याचा अपमान करणारं आहे, अशी तक्रार नाशिकचे शिवसेनेचे पदाधिकारी सुधाकर बडगुजर यांनी दाखल केली होती.