कराड – माझी आणि राजेंद्र यादवांचीही पार्श्वभूमी कराडकरांना माहिती आहे, ज्यांना कष्टच माहिती नाही, ज्यांचा व्यवसाय टक्केवारीवर चालतो, त्यांनी दुसऱ्याची मापे काढावीत ही बाब हास्यास्पद आहे, नापास होऊन पालिकेत आलेल्या लोकांनी दुसऱ्यांची मापे काढू नयेत, जमेल तेवढ्या जबाबदारीने लोकांची कामे करावीत असा टोला ज्येष्ठ नगरसेवक विनायक पावसकर यांनी जनशक्तीचे गटनेते राजेंद्र यादव यांना लगावला आहे.
नगरसेवक पावसकर, नगराध्यक्षा रोहिणी शिंदे यांनी आयोजित केलेल्या पत्रकार परिषदेत ते बोलत होते, जनशक्ती आघाडीच्या राजेंद्र यादव यांनी काही दिवसांपूर्वी पत्रकार परिषद घेऊन पावसकर आणि नगराध्यक्षा रोहिणी शिंदे यांच्यावर टक्केवारीचा आरोप केला होता, त्या संदर्भात भाजपाने पत्रकार परिषद घेतली होती, त्यावेळी नगरसेवक पावसकर बोलत होते, यावेळी नगराध्यक्षा रोहिणी शिंदे, नगरसेवक सुहास जगताप, फारूक पटवेकर, नगरसेविका विद्या पावसकर उपस्थित होते.
पावसकर म्हणाले की, राजेंद्र यादव यांची राजकीय कारकिर्दच फसवेगिरीतून उभी राहिली आहे, त्यांना आम्ही निवडून आणल्यावर आमचा हार त्यांनी स्वीकारला आणि आम्हाला फसवत ते त्यावेळच्या विरोधकांबरोबर गेले यातून त्यांची नीतिमत्ता दिसून येते, आता ते आमच्याबद्दल तत्त्वाच्या गोष्टी बोलतात, माजी मुख्यमंत्री पृथ्वीराज चव्हाण यांनाही फसवले, आमच्या नीतिमत्तेवर बोलण्याचा त्यांना अधिकारच काय? त्यांचं आमदारकीचं स्वप्न अपूर्ण राहिलंय, त्यामुळे ते शहराला त्रास देत आहेत. जिल्ह्यात आमदार, खासदार, पालकमंत्री आहेत, त्यांना डावलून हे स्मार्ट सिटी करण्याची भाषा करत आहेत असं त्यांनी सांगितले.
तसेच ज्यांना आपला वार्ड नीट करता आला नाही, ते स्मार्ट सिटीची भाषा करतात, स्वत:ला जनशक्ती आघाडीचे गटनेते म्हणवून घेतात, त्या आघाडीचे नेते अरूण जाधव आहेत. नुसतं नाव त्यांचे घ्यायचे आणि पालिकेत बोर्डावर यशवंत आघाडीचे गटनेते असे लिहायचं हे लोकांना कळत नाही का? निवडणुका आल्या की गावात यायचं आणि मेळावे घ्यायचे हे यांचे धंदे, त्यांनी आम्हाला नैतिकता शिकवू नये असा इशारा पावसकर यांनी राजेंद्र यादवांना दिला.
मग यांच्या पोटात का दुखतंय
आम्ही सोमवार पेठेत सीसीटीव्ही बसवले, त्यात त्यांच्या पोटात काय दुखतंय? असा सवाल करत पावसकर म्हणाले, चोर, दरोडेखोर, यांच्यावर लक्ष ठेवण्यासाठी असे कॅमेरे असतात, पण या गोष्टींचे विरोधकांना वावडं काय वाटतंय? मग यांचेच असले दोन नंबरचे धंदे आहेत की काय? अशी शंका येते असं पावसकर म्हणाले.
यांचे तर गुलाल खोबरं तिकडं चांगभलं...
गुलाल खोबर तिकडे चांगभलं म्हणणारी प्रवृत्ती विरोधकांची आहे, मला जनतेनं निवडून दिलं आहे, माझा राजीनामा मागायचा अधिकार विरोधकांना नाही, ज्यांना लोकांनी घरी बसवलंय, ते माझा राजीनामा मागतायेत याचे आश्चर्य वाटते असे नगराध्यक्षा रोहिणी शिंदे म्हणाल्या, कोरोनाकाळात लोकांसाठी मी काम केले, तुम्हाला कोणी अडवलं होतं? आमची माप काढण्यातच तुम्ही वेळ घालवला.