कोल्हापूर: धनगर समाजाचे नेते, युवा उद्योजक संदीप कारंडे यांनी बुधवारी स्वाभिमानी शेतकरी संघटनेत प्रवेश केला. सर्कीट हाऊस येथे माजी खासदार राजू शेट्टी यांनी त्यांच्या छातीवर शेतकरी संघटनेचा बिल्ला लावला.
हातणगंलेचे असलेले कारंडे यांनी यापुर्वी अरुण इंगवले यांच्या विरोधात जिल्हा परिषदेची निवडणूक लढवली होती. इंगवले यांच्या कुणबी दाखल्यावर आक्षेप घेऊन न्यायालयीन लढाही दिला आहे. धनगर समाजाच्या आरक्षणासाठी राज्यस्तरीय गोलमेज परिषदेचे त्यांनी कोल्हापुरात आयोजन करुन राज्यातील धनगर समाजाला एकत्र आणण्याचे प्रयत्न चालवले आहे.
धनगरवाड्यावस्त्यावर रस्त्यांसह पायाभूत सुविधा पुरवण्यासाठी त्यांनी थेट मुख्यमंत्र्यापर्यंत प्रयत्न चालवले आहेत. शिवाय धनगर समाजातीलच श्रीमंत व्यक्तीकडून देणग्या घेऊन गोरगरीब वंचितांना चांगले दिवस आणण्यासाठीचे त्यांचे उपक्रम सातत्याने सुरु असतात.