पिंपरी :पिंपरी-चिंचवड शहर पोलीस दलाच्या शिरपेचात आणखी एक मानाचा तुरा रोवला गेला आहे. शहर पोलिस दलात कार्यरत असलेले पोलिस कॉन्स्टेबल ऋषिकेश गजानन अरणकल्ले यांना सन २०२०-२१ या वर्षीचा शिवछत्रपती राज्य क्रीडा पुरस्कार प्रदान करण्यात आला. मल्लखांब या क्रीडा प्रकारात त्यांना हा पुरस्कार मिळाला आहे. नुकताच बालेवाडी क्रीडा नगरी येथे झालेल्या सोहळ्यात हा पुरस्कार त्यांना प्रदान करण्यात आला.
ऋषिकेश अरणकल्ले हे पिंपरी-चिंचवड पोलीस आयुक्तालयातील नियंत्रण कक्षात नेमणुकीस आहेत. अरणकल्ले हे मुळचे पुणे जिल्ह्यातील इंदापूर येथील आहेत. त्यांचे प्राथमिक शिक्षण निगडी येथील ज्ञानप्रबोधिनी शाळेत झाले. तिथे त्यांना मल्लखांब खेळण्याची आवड लागली. त्यानंतर ते पुढील शिक्षणासाठी पुणे शहरात गेले. तिथे त्यांनी उत्तम प्रकारे सराव केला. दरम्यान, जिल्हा, राज्य स्तरीय स्पर्धांमध्ये सहभाग घेत त्यांनी अनेक बक्षिसे मिळवली.
ऋषिकेश हे सन २०१४ साली मल्लखांब या खेळ कोट्यातून सातारा पोलीस दलात रुजू झाले.सातारा पोलीस दलात चार वर्ष काम केल्यानंतर सन २०१८ साली त्यांची पिंपरी-चिंचवड शहरात बदली झाली. त्यानंतर पुढील चार वर्ष त्यांनी पिंपरी-चिंचवड पोलिस दलाकडून राष्ट्रीय स्पर्धांना गवसणी घातली. सन २०१८ मध्ये फोंडा गोवा येथे झालेल्या ३५ व्या राष्ट्रीय अजिंक्यपद मल्लखांब स्पर्धेत सांघिक सुवर्ण पदक आणि टांगता मल्लखांब प्रकारात देखील सुवर्ण पदक पटकावले. ऋषिकेश अरणकल्ले यांना सन २०२१ चा मल्लखांब या क्रीडा प्रकारात शिवछत्रपती राज्य क्रीडा पुरस्कार राज्यपाल रमेश बैस, मुख्यमंत्री एकनाथ शिंदे यांच्या हस्ते प्रदान करण्यात आला. या पुरस्काराबद्दल पोलीस आयुक्त विनयकुमार चौबे यांच्यासह वरिष्ठ अधिकाऱ्यांकडून अरणकल्ले यांच्यावर कौतुकाचा वर्षाव होत आहे.राष्ट्रीय पातळीवर यश-
सातारा पोलिस दलात असताना त्यांनी सन २०१७ साली मध्य प्रदेश मधील उज्जैन येथे झालेल्या ३३ व्या राष्ट्रीय वरिष्ठ पुरुष मल्लखांब अजिंक्यपद स्पर्धेत सांघिक सुवर्ण पदक तसेच पोल मल्लखांब प्रकारात कांस्य पदक मिळवले. सन २०२२ मध्ये उज्जैन येथे झालेल्या ३६ व्या राष्ट्रीय अजिंक्यपद मल्लखांब स्पर्धेत सांघिक सुवर्ण पदक मिळवले.