महापालिका रणधुमाळी रंगात; युती-आघाडीच्या गणिताने राजकीय तापमान वाढले

महाविकास आघाडीत चर्चेच्या फेऱ्या सुरू आहे. महायुतीत उमेदवारी न मिळालेल्यांना महाविकास आघाडीत घेण्यासाठी प्रयत्न सुरू केले आहे.

पिंपरी : महापालिका निवडणुकीच्या पार्श्वभूमीवर पिंपरी-चिंचवड शहरातील राजकीय वातावरण चांगलेच तापले आहे. केंद्रात आणि राज्यात सत्तेत असलेल्या महायुतीतील घटक पक्ष भाजप आणि राष्ट्रवादी काँग्रेस (अजित पवार गट) गटात उमेदवारांची पळवापळवी सुरू आहे. तर महाविकास आघाडीत चर्चेच्या फेऱ्या सुरू आहे. महायुतीत उमेदवारी न मिळालेल्यांना महाविकास आघाडीत घेण्यासाठी प्रयत्न सुरू केले आहे.

महायुतीत भाजप आणि शिवसेना (शिंदे गट) एकत्र निवडणूक लढवणार हे जवळपास निश्चित असले, तरी अद्याप जागावाटपाचा गुंता सुटलेला नाही. कोणत्या पक्षाला किती जागा, कोणते प्रभाग कोणाच्या वाट्याला, यावरून अंतर्गत चर्चा आणि दबावतंत्र सुरू आहे. युतीतील हा विलंब भाजपसाठी डोकेदुखी ठरू शकतो, असे निरीक्षकांचे मत आहे.

दुसरीकडे, राष्ट्रवादी काँग्रेसचे दोन्ही गट एकत्र आले तर भाजपच्या जागांवर मोठा परिणाम होऊ शकतो. तसेच महाविकास आघाडी आणि अजित पवार गट यांची युती होण्यासाठी प्रयत्न सुरू आहेत. मनसेने महाविकास आघडीबरोबर जाण्याची भूमिका घेतली आहे. त्यामुळे भाजपकडून ‘एकला चलो’पासून ते आक्रमक इनकमिंगपर्यंत सर्व पर्याय खुले ठेवले आहेत. महायुतीतील घटक पक्ष भाजप आणि शिवसेना शिंदे गट, आरपीयआय यांच्यातील जागावाटप सूत्र ठरलेले नाही.

उमेदवारीच्या तोंडावर कॉँग्रेसमध्ये खळबळ

या पार्श्वभूमीवर काँग्रेसचे शहराध्यक्ष कैलास कदम यांनी दिलेला राजीनामा शहरातील राजकारणात खळबळ उडवणारा ठरला आहे. काँग्रेसमधील अंतर्गत नाराजी आणि नेतृत्वाचा प्रश्न पुन्हा एकदा ऐरणीवर आला आहे. दरम्यान, भाजपने इतर सर्वच पक्षांतील माजी महापौर, माजी स्थायी समिती अध्यक्षांसह अनेक माजी नगरसेवकांचा पक्षप्रवेश करून आपली ताकद वाढवली आहे. त्याला प्रत्युत्तर म्हणून राष्ट्रवादी (अजित पवार गट) यांनीही भाजप, शरद पवार गटासह उद्धव ठाकरे गटातील नगरसेवक व पदाधिकाऱ्यांना प्रवेश देत आपली बाजू मजबूत केली आहे. एकूणच, युती-अघाड्यांची गणिते, पक्षांतरे आणि नेतृत्वबदल यामुळे पिंपरी-चिंचवडची महापालिका निवडणूक चुरशीची होईल की एकतर्फी होईल हे पाहणे तितकेच महत्त्वाचे ठरणार आहे.