पिंपरी : मानलेली बहीण नशेत असताना तिच्या कंपनीतील सहकाऱ्याने तिच्यावर लैंगिक अत्याचार केले. याचा राग आल्याने भावाने वीट डोक्यात घालून बहिणीच्या सहकाऱ्याचा खून केला. वाकड येथील भूमकर वस्तीत शुक्रवारी (दि. ५) ही घटना घडली.
निकेतकुणाल विजयकुमार सिंह (२८, रा. भुजबळवस्ती, वाकड), असे खून झालेल्याचे नाव आहे. लोकेंद्र किशोरसिंह (२८, रा. वाकड, मूळ रा. राजस्थान) या संशयिताच्या विरोधात पोलिसांनी गुन्हा दाखल केला. पोलिस उपनिरीक्षक ज्ञानेश्वर झोल यांनी याप्रकरणी बुधवारी (दि. १०) हिंजवडी पोलिस ठाण्यात फिर्याद दिली.
वरिष्ठ पोलिस निरीक्षक कन्हैया थोरात यांनी दिलेल्या माहितीनुसार, संशयित लोकेंद्र यांची मानलेली बहीण आणि निकेतकुणाल सिंह हे एकाच कंपनीत नोकरीला होते. दरम्यान, ३ एप्रिल रोजी रात्री त्यांच्या कंपनीतील सहकारी पार्टीसाठी एकत्र आले. लोकेंद्रच्या बहिणीला नशा जास्त झाल्याने ती निकेतकुणाल याच्या फ्लॅटवर थांबली. त्यावेळी निकेतकुणाल याने तिच्यावर लैंगिक अत्याचार केले. याबाबत तिने तिचा मानलेला भाऊ लोकेंद्र याला माहिती दिली.
याबाबत जाब विचारण्यासाठी लोकेंद्र वीट घेऊन निकेतकुणाल याला मारण्यासाठी त्याच्या फ्लॅटवर गेला. तेथे दोघांमध्ये वाद झाला. त्यावेळी लोकेंद्र याने निकेतकुणाल याच्या डोक्यात वीट घातली. यामध्ये जखमी झालेल्या निकेतकुणाल याला रुग्णालयात दाखल केले. उपचार केल्यानंतर त्याला घरी सोडण्यात आले.