पिंपरी : चिंचवड जकात नाका येथील एका स्नॅक्स सेंटरमध्ये गॅस सिलेंडरचा स्फोट झाला. यामध्ये दोघेजण जखमी झाले. ही घटना मंगळवारी (दि. ३) सकाळी सव्वा नऊच्या सुमारास घडली.
अग्निशामक दलाने दिलेल्या माहितीनुसार, जैन शाळेजवळ शिवा स्नॅक्स सेंटर आहे. सकाळी सव्वानऊच्या सुमारास सेंटर सुरू असताना अचानक सिलेंडरने पेट घेतला. यावेळी नाष्टा करण्यासाठी आलेल्या नागरिकांमध्ये घबराट उडाली. आगीत दुकानाचा मालक तेवर आणि कामगार प्रदीप कुमार हे दोघे जण जखमी झाले.
मनी तेवर (वय ३२ ), प्रदीप कुमार (वय २० दोघेही रा. चिंचवड) अशी जखमी झालेल्यांची नावे आहेत. त्यापैकी उपहारगृहाचे मालक तेवर यांना जवळच्या खासगी रुग्णालयात तर कामगार प्रदीप कुमार यांना वायसीएम रुग्णालयात उपचारासाठी दाखल केले आहे. घटनेची माहिती मिळताच अग्निशामक मुख्यालयातून दोन बंब तसेच प्राधिकरण उपकेंद्राचा एक बंब घटनास्थळी दाखल झाला. त्यांनी अवघ्या दहा मिनिटांमध्ये आगीवर नियंत्रण मिळविले.