अर्थसंकल्प तासाभरात मंजूर

आगामी आर्थिक वर्ष २०१६-१७साठी तळेगाव दाभाडे नगर परिषदेचा अर्थसंकल्प (बजेट) शुक्रवारी नगराध्यक्षा माया भेगडे यांच्या अध्यक्षतेखालील नगर परिषद सभागृहातील

तळेगाव स्टेशन : आगामी आर्थिक वर्ष २०१६-१७साठी तळेगाव दाभाडे नगर परिषदेचा अर्थसंकल्प (बजेट) शुक्रवारी नगराध्यक्षा माया भेगडे यांच्या अध्यक्षतेखालील नगर परिषद सभागृहातील विशेष सभेत तासाभरात मंजूर करण्यात आला.आगामी आर्थिक वर्षात ९४ कोटी ४५ लाख १८ हजार ६४४ रुपये विविध मार्गाने पालिकेच्या तिजोरीत जमा होणार असल्याचा अंदाज देण्यात आला आहे. विविध कामांसाठी ९४ कोटी ४४ लाख ७४ हजार रुपये खर्चाची तरतूद केली आहे. गेल्या वर्षीच्या अर्थसंकल्पाशी तुलना करता, यंदा २७ कोटी ६२ लाखांची आवक कमी होणार असून, होणारा खर्चही १३ कोटी ६० लाख रुपयांनी कमी केल्याचे दिसते. विरोधी बाकावरील नगरसेवकांनी या अंदाजपत्रकामध्ये भांडवली खर्च ६७ कोटी, तर भांडवली जमा केवळ ४६ कोटी असा तब्बल २१ कोटींचा फरक असल्याचे निदर्शनास आणल्यानंतर पालिकेचे मुख्याधिकारी कैलास गावडे यांनी खुलासा करून त्यांचे समाधान करण्याचा प्रयत्न केला. उपनगराध्यक्ष गणेश खांडगे, नगरसेविका सुलोचना आवारे, शालिनी खळदे, तनुजा जगनाडे, सुनंदा मखामले, तसेच नगरसेवक सत्येंद्रराजे दाभाडे, गणेश काकडे, किशोर भेगडे, सुरेश धोत्रे, चंद्रभान खळदे, नितीन पवार आदी मंडळी सत्ताधारी पक्षातर्फे आणि विरोधी पक्षनेते सुनील शेळके, नगरसेविका सुजाता खेर, अमृता टकले, शुभांगी शिरसाट, नगरसेवक गणेश भेगडे, सुशील सैंदाणे, चंद्रकांत शेटे आदी विरोधी पक्षाच्या वतीने उपस्थित होते. अंदाजपत्रकाचे वाचन पालिकेचे अंतर्गत लेखापरीक्षक कणसे यांनी केले. काही नगरसेवकांनी केलेल्या सूचनांचा विचार करण्याचे आश्वासन मुख्याधिकारी गावडे यांनी दिल्यानंतर सभागृहाने अंदाजपत्रक तासाभराच्या आतच मंजूर केले. (वार्ताहर)अंदाजपत्रकात सन २०१६-१७ साठी आरंभीची शिल्लक १४ कोटी दाखविली आहे. याचाच अर्थ गतवर्षी १४ कोटींच्या विकासकामांचे नियोजन करण्यात सत्ताधारी अपयशी ठरले आहेत.अर्थसंकल्प मांडणीचा मसुदा सदोष वाटतो. भिंग लावूनही तो वाचता येईल का नाही इतका अस्पष्ट आहे. सन २०१२-१३, १३-१४, १४-१५, १५-१६ आणि १६-१७च्या गुंतागुंतीच्या आकडेवारीची सरमिसळ केली आहे. रकमा रुपयांत, पैशांत, हजारांत, लाखात याचा स्पष्ट उल्लेख केलेला नाही. रकमांचा स्पष्ट उल्लेख नसेल, तर नियमाप्रमाणे तो ग्राह्य धरता येणार नाही. या संदर्भात लेखापालांचा सल्ला घेण्याची गरज आहे. जमा-खर्चातील घट पाहता गेल्या वर्षीच्या तुलनेत २७ कोटी ६२ लाख रुपयांची घट व खर्चाच्या बाजूत १३ कोटी ६० लाख रुपयांची घट असल्याने हा अर्थसंकल्प विकासाचा घसरता आलेख दर्शविणारा ठरू शकेल.जमेच्या ठळक बाबी बाल्कनी बंद करणे व पेड एफएसआय : ६ कोटी रुपये, व्याज : १ कोटी ७४ लाख, ५० हजार.शिक्षण उपकर : १.५ कोटी वृक्षाकर : ३४ लाख ५१ हजार खर्चाच्या ठळक बाबी पाणीपुरवठा वीजबिल : ३ कोटी रुपये, नाट्यगृह उभारणी : १ कोटी १० लाख, पथदिवे वीजबिल : ८० लाख, घनकचरा व्यवस्थापन : ५० लाख, जलशुद्धीकरण केंद्र दुरुस्ती : २० लाख, शिक्षण मंडळ अनुदान : २० लाख, मोकाट जनावरांचा बंदोबस्त : १२ लाख, कायदेविषयक फी आणि दावे खटले : १० लाख, छत्रपती शिवाजीमहाराज जयंती : ५ लाख, डॉ. बाबासाहेब आंबेडकर जयंती : ५ लाख, झोपडपट्टी पुनर्वसन : ५ लाख, नगराध्यक्ष मानधन व वाहनभत्ता ३ लाख, प्राथमिक शिक्षण : २ लाख. पालिकेचे हे अंदाजपत्रक फुगवटाविरहित असून,करवसुली कमी दिसत असली, तरी गेल्या आर्थिक वर्षाची तुलना करता ती चांगली आहे.मार्चअखेर ती ८० टक्के होईल, अशी आशा आहे.- माया भेगडे, नगराध्यक्षाबॅँकेतील ठेवी, तत्सम मार्गातून व्याजापोटी मिळणाऱ्या उत्पन्नापोटी आगामी वर्षात सुमारे पावनेदोन कोटी रुपये व्याजापोटी उत्पन्नाचे उद्दिष्ट अंदाजपत्रकात दाखवले आहे, ही अभिनंदनीय बाब आहे. परंतु, नगर परिषद ही काही बँक किंवा नफेखोरी करणारी संस्था नाही.त्यामुळे ठेवींबाबत पुनर्विचार गरजेचा आहे. २५ ते ३० कोटींच्या ठेवी कायमस्वरूपी बॅँकेत ठेवणारी तळेगाव नगरपालिका राज्यात एकमेव असेल, तर ते अभिनंदनास पात्र नाही. ठेवींच्या रकमेची विकासकामांसाठी तरतूद करणे गरजेचे आहे.- सुनील शेळके, विरोधी पक्षनेते