लोकमत न्यूज नेटवर्क
पिंपरी : कर्तव्यावर असताना पोलिस अंमलदाराचा अपघाती मृत्यू झाला. बेंगळुरू - मुंबई महामार्गावर पुनावळे येथे येथे सोमवारी (दि. १५) रात्री पावणेअकराच्या सुमारास ही घटना घडली.
सचिन शंकर नरुटे (३७, रा. वाकड, मूळगाव कुपवाड, सांगली) असे मृत्यू झालेल्या पोलिस अंमलदाराचे नाव आहे. पोलिसांनी दिलेल्या माहितीनुसार, पोलिस हवालदार सचिन नरुटे हे देहूरोड पोलिस ठाण्यात कार्यरत होते. सोमवारी रात्री ते पुनावळे येथून देहूरोड पोलिस ठाण्याकडे जात होते. त्यावेळी पुनावळे पुलाजवळ त्यांच्या दुचाकीला अज्ञात वाहनामुळे अपघात केल्याने नरुटे जखमी झाले. त्यांना चिंचवड येथील रुग्णालयात दाखल केले असता उपचारापूर्वीच त्यांचा मृत्यू झाल्याचे डाॅक्टरांनी सांगितले. अपघात झाल्यानंतर अज्ञात वाहन चालक घटनास्थळी न थांबता पळून गेला. याप्रकरणी रावेत पोलिस ठाण्यात गुन्हा दाखल करण्यात आला.
सचिन नरूटे हे १६ वर्षांपूर्वी पोलिस दलात भरती झाले होते. ग्रामीण पोलिस ते कार्यरत होते. दरम्यान पिंपरी-चिंचवड पोलिस आयुक्तालयाची निर्मिती झाल्यानंतर ते वाकड पोलिस ठाण्यात कार्यरत होते. त्यानंतर ते सध्या देहूरोड पोलिस ठाण्यामध्ये कार्यरत होते. त्यांच्या मागे पत्नी, दोन लहान मुली आहेत.