पाथरी (परभणी): समोरील दुचाकीचे टायर अचानक फुटले यामुळे धडक होण्यापासून वाचविण्याच्या प्रयत्नात दोन कार समोरासमोर धडकल्याची घटना पाथरी-पोखरणी रस्त्यावरील रेणापूर पुलावर आज दुपारी 2 वाजेच्या सुमारास घडली. या अपघातात कारमधील दोघे आणि दुचाकीस्वार गंभीर जखमी झाले आहेत.
धारूर तालुक्यातील तेलगाव येथील पतीपत्नी दुचाकीवरून ( क्रएम एच 14 जे सी 5787 ) पाथरीहून पोखरणीकडे जात होते. रेणापूर गावाजवळील मोठ्या पुलावर येताच दुचाकीचे समोरील टायर अचानक फुटले. यामुळे दुचाकीस्वाराचे नियंत्रण सुटले. हे पाहताच पाठीमागून येणाऱ्या कारच्या ( क्र एम एच 14 जी डी 5193 ) चालकाने दुचाकीस्वारास वाचविण्याचा प्रयंत्न केला. मात्र, या प्रयत्नात कार समोरून येणाऱ्या दुसऱ्या कारला ( एम एच 22 एच 698) धडकली. यात कार मधील दोघे आणि दुचाकीस्वार गंभीर जखमी झाले आहेत. जखमींवर पाथरी येथील ग्रामीण रुग्णालयात उपचार सुरु आहेत.