आशिष राणे
विरारच्या विजय वल्लभ रुग्णालयाला लागलेल्या भीषण आगीच्या घटने संदर्भात व वसई विरार महापालिका हद्दीतील पालिका व खाजगी रुग्णालयातील सोयीं सुविधा, दक्षता आणि रुग्णांना सुरक्षितता अशा विविध विषयांवर चर्चा करण्यासाठी बैठक झाली. या जळीत घटनेच्या निमित्ताने का होईना मात्र कधी एकमेकांना न भेटणारे किंवा संपर्कात नसणारे शिवसेनेचे नेते विरार दरबारी शुक्रवारी सकाळी एकत्रित आले. या प्रसंगी विजय वल्लभ रुग्णालयाला भेट दिल्यानंतर शिवसेना व बविआ नेतृत्व एकत्रित येऊन त्यांनी विरारच्या विवा कॉलेज मधील आम हितेंद्र ठाकुर यांच्या बविआ पक्ष कार्यालयाच्या आवारात शुक्रवारी सकाळी 11 वाजता एक महत्त्वाची आढावा बैठक घेतली
यावेळी आमदार हितेंद्र ठाकूर, आमदार क्षितीज ठाकूर, नगरविकास मंत्री एकनाथ शिंदे, पालकमंत्री दादाजी भुसे ,खासदार राजेंद्र गावित, जिल्हाधिकारी डॉ माणिक गुरसळ माजी महापौर प्रवीण शेट्टी,आयुक्त गंगाथरन डी आदी यावेळी उपस्थित होते. तासभर संपन्न झालेल्या या आढावा बैठकीत महापालिका हद्दीतील सर्व रुग्णालयाचे फायर ऑडिट, शहरात अपुरा असलेला ऑक्सिजन पुरवठा, रेमडेसीविर इंजेक्शन, औषधे त्याचबरोबर रुग्णालय सोयीं सुविधा आणि रुग्णांची सुरक्षितता यामध्ये प्रामुख्याने शहरांतील मोठ्या रुग्णालयामध्ये ऑक्सिजन प्लान्ट उभारणी करण्यास मदत करणे व त्यांना यासाठी शासनाच्या वतीने सबसिडी देणे तसेच बंद औद्योगिक वसाहती आस्थापना आहेत त्यांच्याकडून रिकामी सिलेंडर्स मागवून घेणे अशा अनेक महत्त्वाच्या विषयावर चर्चा झाली.
दरम्या, यावेंळी पालकमंत्री भुसे व नगरविकास मंत्री एकनाथ शिंदे यांनी या आढावा बैठकीत झालेल्या सर्व विषय व समस्येची सविस्तर माहिती मुख्यमंत्र्यांना दिली जाईल आणि स्थनिक पातळीवर जे काही करता येईल त्या गोष्टी पालिका आयुक्त व जिल्हाधिकारी यांनी याबाबत लक्ष केंद्रित करायच्या सूचनाही दिल्या.