पाथरी ( परभणी ) - वडी पाटी ते वडी रस्त्यावर मॉर्निग वॉक करत असलेल्या महिलांना रस्त्याच्या कडेला बराच वेळापासून मोबाईल वाजत असल्याचे निदर्शनास आले. तेव्हा जवळ जाऊन पाहणी केली असता तेथे एका तरुणाचा संशयास्पद अवस्थेत मृतदेह आढळून आल्याची घटना आज सकाळी ६ वाजेच्या सुमारास घडली.
गोपाळ शिंदे हा तरुण वडी वस्ती येथे राहतो. गुरुवारी रात्री ८ वाजेच्या सुमारास तो घरातून वडी गावाकडे गेला होता. रात्री उशिरापर्यंत गोपाळ परत न आल्याने नातेवाईकांनी त्याचा शोध घेतला. फोन केला असता मोबाईलवर फक्त रिंग जात होती. दरम्यान, आज सकाळी ६ वाजेच्या सुमारास गावातील काही महिला वडी रस्त्यावर मॉर्निंग वॉक करत होत्या. वडी वस्तीकडे जाणाऱ्या रस्त्याच्या कडेला मोबाईल वाजत असल्याचे त्यांना निदर्शनास आले. महिलांनी जवळ जाऊन पाहिले असता एका तरुणाचा संशयास्पद अवस्थेतील मृतदेह आढळून आला.
महिलांनी ग्रामस्थांना माहिती दिली असता काहीजण घटनास्थळी आले. मृतदेहाची पाहणी केली असता तो गोपाळ शिंदेचा असल्याचे स्पष्ट झाला. याची माहिती मिळताच पोलिसांनी घटनास्थळी पाहणी करून पंचनामा केला. घटनास्थळी गोपाळची दुचाकी आढळून आली. तसेच मृतदेह संशयास्पद अवस्थेत आढळून आल्याने हा घातपात की अपघात अशी शंका व्यक्त करण्यात येत आहे. दरम्यान, या प्रकरणात अद्याप कोणतीही तक्रार दाखल झाली नाही, अशी माहिती तपास अधिकारी सहाय्यक पोलीस निरीक्षक प्रवीण सोमवंशी यांनी दिली.