पालम (परभणी) : शेतीत सतत होणारी नापीकी व कर्जाचा वाढत जाणारा बोजा सहन न झाल्याने तालुक्यातील डिग्रस येथील 40 वर्षीय शेतक-याने गळफास घेऊन आत्महत्या केली. ही घटना शुक्रवारी रात्री घडली आहे.
पुरभाजी किशन कुरे (40) असे मयत शेतक-याचे नाव आहे. कूरे याना डिग्रस शिवारात दोन एकर 20 आर जमीन होती. या शेतीवर स्टेट बँक ऑफ इंडिया चे 50 हजार व काही खाजगी कर्ज आहे. मागील वर्षी त्याच्या मुलीचे लग्न झाले होते. शेतात नापीकी होत असल्याने फारसे उत्पादन हाती लागले नाही. बॅकेचा वसुलीसाठी तगादा व खाजगी कर्ज फेडणे कठीण झाल्याने मागील काही दिवसांपासून ते नैराश्यात होते. शुक्रवारी रात्री घरातील सर्व जण झोपल्यानंतर त्यांनी घरातच गळफास घेऊन आत्महत्या केली. त्यांच्या पश्चात पत्नी , दोन मुली , दोन मुले असा परिवार आहे.