जिंतूर ( परभणी) : पैसे देवाणघेवाणीच्या कारणावरून एकाचा चाकूने वार करून निर्घृण खून केल्याची घटना जिंतूर शहरात 14 मे च्या रात्री आठ वाजेच्या सुमारास घडली. सगणनूर छगननूर कुरेशी असे मृताचे नाव आहे.
याबाबत प्राथमिक माहिती अशी की, कुरेशी मोहल्यातील अमजद सर्वर कुरेशी आणि आलीम मुसा कुरेशी यांनी सगणनूर छगननूर कुरेशी यास पैशाच्या देवाणघेवाणवरून जबर मारहाण करत चाकुचे वार केले. गंभीर जखमी सगणनुर कुरेशी यास जिंतूर येथील ग्रामीण रुग्णालयात प्राथमिक उपचार करून परभणी येथे हलविण्यात आले. मात्र त्या ठिकाणी डॉक्टरांनी त्यास मृत घोषित केले.
त्यानंतर शहरांमध्ये मोठ्या जमाव जमला. ग्रामीण रुग्णालयाजवळ दोन ते तीन हजार लोकांचा जमा जमल्याने तणावाची परिस्थिती निर्माण झाली होती. माहिती मिळताच स्थानिक गुन्हा अन्वेषण विभागाचे सहाय्यक पोलीस अधीक्षक यशवंत काळे, उपविभागीय अधिकारी ओहोळ, पोलीस निरीक्षक अशोक घोरबांड, जिंतूर पोलीस स्टेशनचे सुकाळे यांनी धाव घेऊन वेळीच परिस्थिती हाताळल्याने तणाव निवळला.
याप्रकरणी पोलिसांनी अमजद सरवर कुरेशी रा.फतन काॅलनी जिंतूर) आणि अलीम मुसा कुरेशी (रा.कुरेशी मोहल्ला जिंतूर) यांना तात्काळ अटक केली आहे. रात्री दोन वाजता मृतदेह नातेवाईकांच्या ताब्यात देण्यात आला.