जकार्ता - भारतीय खेळाडूंचा उत्साह आणखी वाढविण्यासाठी केंद्रीय क्रीडामंत्री राज्यवर्धन राठोड सध्या इंडोनेशियामध्ये उपस्थित आहेत. स्वत: आॅलिम्पिक रौप्य पदक विजेते नेमबाज असलेले राठोड यांचे एक छायाचित्र सोशल मीडियावर मोठ्या प्रमाणात व्हायरल होत असून याद्वारे त्यांनी देशवासीयांची मने जिंकली.
सोशल मीडियात व्हायरल होणाऱ्या या छायाचित्रात राठोड यांनी खाद्यपदार्थांचा ट्रे पकडला असून त्यांच्यासह भारतीय खेळाडू व प्रशिक्षक आहेत. मिळालेल्या माहितीनुसार राठोड यांनी स्वत: त्यांना जेवण वाढले. हे छायाचित्र सध्या नेटीझन्सच्या पसंतीस पडले असून त्यांनी राठोड यांच्या या कृतीस मनापासून दाद देत त्यांचे आभारही मानले. दरम्यान, क्रीडामंत्री राठोड हे ऑलिंपिक रौप्यपदक विजेते आहेत, त्यामुळे देशाला एक उत्तम खेळाडू क्रीडामंत्री म्हणून मिळाल्याचेही या छायाचित्रासोबत म्हटले आहे.