दुबई : भारताची स्टार बॅडमिंटनपटू सायना नेहवाल, के.श्रीकांत उद्या, बुधवारपासून सुरू होणाऱ्या बीडब्ल्यूएफ विश्व सुपर सीरिज फायनल स्पर्धेत आपले नशीब अजमावणार आहेत़ स्पर्धेत दोन्ही खेळाडूंना कठीण ड्रॉ मिळाला आहे़ त्यामुळे त्यांना स्पर्धेत उत्कृष्ट कामगिरी करण्यासाठी विशेष मेहनत घ्यावी लागेल़ चायना सुपरचे जेतेपद मिळविल्यामुळे आत्मविश्वास उंचावलेली सायना व श्रीकांतला या स्पर्धेत जागतिक क्रमवारीतील अव्वल ८ खेळाडूंत समावेश असलेल्या खेळाडूंशी झुंजावे लागेल़ ही स्पर्धा दुबईत होणार आहे़ स्पर्धेत सायनाला चीनची शिजियान वांग, कोरियाची ह्युन सुंग आणि यिओन जू बाए यांचा सामना करावा लागेल़, तर श्रीलंकातला पुरुष गटात डेन्मार्कचा यान ओ योगेसेन, जपानचा केतो मोमोतो आणि इंडोनेशियाच्या टॉमी सुगियातोचे आव्हान राहील़ या स्पर्धेच्या प्रत्येक गटातून अव्वल दोन खेळाडू उपांत्य फेरीत पोहोचतील़ सायनाचा शिजियान विरुद्ध ५-५ असा विक्रम आहे़ असे असले तरी गत पाच सामन्यांपैकी ४ मध्ये चिनी खेळाडूने बाजी मारली आहे़ दुसरीकडे सुंगविरुद्ध सायनाचा विक्रम ४-१ असा आहे़ या दोन्ही खेळाडूंत झालेल्या गत लढतीत सायनाला पराभव स्वीकारावा लागला होता़ जागतिक क्रमवारीत नवव्या स्थानावर असलेल्या बाएविरुद्ध सायनाने ६ विजय मिळविले आहेत, तर ४ वेळा भारतीय खेळाडूला पराभवाचा सामना करावा लागला आहे़पुरुष गटात श्रीकांतच्या कामगिरीवर सर्वांचे लक्ष राहील़ कारण स्पर्धेत तो एकमेव पुरुष खेळाडू आहे़ त्याने यापूर्वी योगेसेन आणि मोमोतो यांना धूळ चारली आहे, तर सुगियार्तोकडून मात खावी लागली आहे़ स्पर्धेतील ‘अ’ गटाला ग्रुप आॅफ डेथ संबोधले जात आहे़ (वृत्तसंस्था)
सायना, श्रीकांतला कठीण ड्रॉ
By admin | Updated: December 17, 2014 01:26 IST