Sania Mirza, Pakistan Tennis Shoaib Malik: पाकिस्तानची महिला टेनिस स्टार मेहक खोखर (Meheq Khokhar) सध्या चर्चेत आहे. मेहकने भारतीय महिला टेनिसपटूसानिया मिर्झा हिला पाकिस्तानात येऊन पाकिस्तानी महिला टेनिस संघाचे प्रशिक्षक बनण्याचे आवाहन केले आहे. सानियाने प्रशिक्षण दिले तर पाकिस्तानचा महिला टेनिस संघ अधिक चांगली कामगिरी करू शकेल, असे तिने म्हटले आहे. तसेच, मेहकने यासाठी शोएब मलिकचीही मदत घेतली आहे.
मेहक खोखरने एका व्हिडिओमध्ये सांगितले की, लवकरच पाकिस्तान फेडरेशन कपसह इतर अनेक आंतरराष्ट्रीय स्पर्धा सुरू होणार आहेत. सानिया मिर्झा सतत पाकिस्तानात येत असते. त्यामुळे अशा परिस्थितीत सानियाने पाकिस्तानच्या महिला टेनिस संघाला मार्गदर्शन व प्रशिक्षण द्यावे. मेहकने तिच्या व्हिडीओमध्ये असेही म्हटले की, मी यासाठी शोएब मलिक यांची मदत घेईन. पाकिस्तान टेनिस संघाला प्रशिक्षण देण्याची गळ शोएब मलिकने पत्नी सानियाला घालावी अशी विनंती मी त्यांना करेन. कारण तसे झाल्यास त्याचा पाकिस्तानी टेनिस संघाला (आम्हाला) खूप फायदा होईल.
मेहक खोखरबद्दल सांगायचे तर, सध्या तिची गणना पाकिस्तानच्या अव्वल टेनिसपटूंमध्ये केली जाते. सानिया मिर्झासारख्या ग्लॅमरस अवतारासाठीही मेहक ओळखली जाते. ती अनेक टीव्ही शोमध्येही दिसली आहे. सानिया मिर्झा ही पाकिस्तानी क्रिकेटर शोएब मलिकची पत्नी आहे, त्यामुळे ती अनेकदा पाकिस्तानात जात असते. काही काळापूर्वी सानिया मिर्झाने पाकिस्तानमध्ये बरेच दिवस होती. तिथे ती अनेक टीव्ही शो आणि इतर कार्यक्रमांनाही गेली होती.