रियो दि जेनेरियो : ब्राझीलचा दिग्गज फुटबॉलपटू नेमारवर एका महिलेने बलात्काराचा आरोप केला आहे. या प्रकरणी संबंधित महिलेने साओ पावलो येथे नेमारविरुद्ध पोलीसांत तक्रारही केली. ब्राझील पोलीसांच्या कागदपत्रानुसार नेमारवर मागील महिन्यात पॅरिस येथे बलात्कार केल्याचा आरोप आहे. ही घटना १५ मे रोजी रात्री एका हॉटेलमध्ये घडली.
नेमारने सोशल नेटवर्कवर पोस्ट केलेल्या व्हिडिओद्वारे सांगितले की,‘मला या प्रकरणात अडकवले जात आहे. हे सर्व प्रकरण पैशासाठी होत असून तपास करणारे अधिकारी काय करतात ते पाहू’ स्थानिक मीडियाच्या वृत्तानुसार पिडीत महिलाने नेमारवर मारहाण व बलात्काराचा आरोप केला असून हा सर्व प्रसंग पॅरिसच्या एका हॉटेलमध्ये घडल्याचा तिचा दावा आहे. मात्र, नेमारने हे सर्व आरोप फेटाळून लावले आहेत. ही महिला ब्लॅकमेल करत असल्याचा दावा नेमारच्या वडिलांनी केला.
नेमारच्या वडिलांनी सांगितले की, ‘नेमारने कोणताही गुन्हा केलेला नाही. त्या महिलेसोबत नेमार एकदा डेटवर गेला होता, पण त्यानंतर तो तिला भेटला नाही. ही महिला पैशांसाठी नेमारला फसवत असून ती आमच्या कुटूंबालाही ब्लॅकमेल करत आहे.’