पुणे : महाराष्ट्र राज्य कुमार व वरिष्ठ बिलीयर्डस् व स्नूकर निवड चाचणी स्पर्धेच्या कुमार स्नूकर गटात मुंबईच्या ईशप्रीत सिंंग याने विजेतेपद पटकावले. पुण्याच्या अमोल अब्दागिरी व तहा खान यांनी अनुक्रमे दुसरे व तिसरे स्थान तर, साताऱ्याच्या अनिकेत तावरेने चौथे स्थान मिळवले. पीवायसी हिंंदू जिमखाना व डेक्कन जिमखाना येथील बिलीयर्डस् आणि स्नूकर हॉलमध्ये ही स्पर्धा झाली. ईशप्रीत सिंंगने अमोल अब्दागिरी, तहा खान आणि अनिकेत तावरे या तिघांना सहजपणे नमवून अव्वल क्रमांक मिळवला. दुसऱ्या क्रमांकासाठीच्या लढतीत अमोल अब्दागिरीने तहा खानला ५८-३८, ६०-२३, ८-१०२ (७४), ५६-३९ असे पराभूत केले. अनिकेत तावरे आणि अमोल अब्दागिरीच्या निर्णायक सामन्यात अनिकेतने ५५-४०, ५०-२१, ३०-६२, ४८-५१, ५०-४३ अशी बाजी मारली. मात्र अमोलचा फ्रेम गुणांक अनिकेतपेक्षा सरस असल्याने अमोलला द्वितीय स्थान मिळाले. राष्ट्रीय महिला खेळाडू उषा खंडेलवाल यांच्या हस्ते विजेत्यांना गौरविण्यात आले. स्पर्धेचे संचालक सलील देशपांडे, संयोजन समिती सदस्य समर खंडेलवाल या वेळी उपस्थित होते. ईशप्रीतचे हे दुसरे राज्यस्तरीय विजेतेपद ठरले. याआधी या १९वर्षीय खेळाडूने २०१३मध्ये जेतेपद मिळवले होते. तो मुंबईतील खार जिमखाना येथे सराव करतो.
मुंबईकर ईशप्रीत सिंगची बाजी
By admin | Updated: November 25, 2015 02:58 IST