Kirti Voight breaks a 3-year-old record | कीर्ती भोईटेने मोडला २७ वर्षे जुना विक्रम
कीर्ती भोईटेने मोडला २७ वर्षे जुना विक्रम

मुंबई : कांदिवलीच्या ठाकूर महाविद्यालयाची विद्यार्थिनी कीर्ती भोईटे हिने महाविद्यालयीन अ‍ॅथलेटिक्स स्पर्धेत विक्रमी कामगिरी करताना सुवर्णपदकावर कब्जा केला. त्याचवेळी रश्मी शेरेगर आणि सरोज शेट्टी यांना अनुक्रमे रौप्य व कांस्यपदकावर समाधान मानावे लागले. कीर्तीने या वेळी सेंट झेवियर्स महाविद्यालयाच्या झेनिया एर्टन हिने १९९२-९३ साली नोंदवलेला विक्रम मोडला.
मुंबई विद्यापीठाच्या मान्यतेने मरिन लाइन्स येथील क्रीडा संकुलात झालेल्या या स्पर्धेत २०० मीटर शर्यतीत कीर्तीने विक्रमी कामगिरी करताना मुंबई विद्यापीठ आंतर महाविद्यालीय स्पर्धेतील तब्बल २७ वर्षांपूर्वीचा विक्रम मोडला. ठाकूर विज्ञान व वाणिज्य महाविद्यालयाच्या कीर्तीने २४.३ सेकंदांची वेळ देत सहजपणे सुवर्णपदकावर नाव कोरले. झेनियाने २४.८ अशी वेळ नोंदवत २७ वर्षांपूर्वी विक्रमी कामगिरी केली होती. ती कामगिरी मागे टाकत कीर्तीने सुवर्ण धाव घेतली. त्याचवेळी ठाकूर अभियांत्रिकी महाविद्यालयाच्या रश्मीने २५.२ सेकंदासह रौप्यपदकावर कब्जा केला. रिझवी महाविद्यालयाच्या सरोजला २६.४ सेकंदांसह कांस्यपदकावर समाधान मानावे लागले.

Web Title: Kirti Voight breaks a 3-year-old record

Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.