आसाम, गुवाहटी : खेलो इंडिया युथ गेम्सच्या तिस-या पर्वात महाराष्ट्राच्या श्रुती कांबळे हिने १७ वर्षाखालील गटात उंच उडीत सुवर्णवेध घेतला आणि या स्पर्धेतील पदार्पणातच नेत्रदीपक कामगिरी केली. तिच्या सहकारी रिया पाटील व निधी योगेंद्रसिंग यांनी अनुक्रमे १७ व २१ वर्र्षालील गटात ४०० मीटर्समध्ये ब्राँझपदकाची कमाई केली.
सायंकाळच्या सत्रात झालेल्या या स्पधेर्तील उंच उडीत श्रुतीने दुस-या प्रयत्नात १.६४ मीटर्सपर्यंत उडी मारली. तिने नुकत्याच पंजाबमध्ये झालेल्या शालेय राष्ट्रीय स्पर्धेत सुवर्णपदक जिंकले होते तर फेडरेशन चषक स्पर्धेत तिला ब्राँझपदक मिळाल होते. १७ वर्षीय खेळाडू श्रुती ही इचलकरंजी येथे सुभाष माने यांच्या मार्गदर्शनाखाली सराव करते. ती कबनूर कनिष्ठ महाविद्याालयात ११ वी वाणिज्य शाखेत शिकत आहे. येथील विजेतेपदाबाबत तिला आत्मविश्वाास होता.
शर्यतींमध्ये कोल्हापूरची १६ वर्षीय खेळाडू रिया हिने येथे ४०० मीटर्सचे अंतर ५७.८४ सेकंदात पार केले. पायल व्होरा (दिल्ली-५७.०८ सेकंद) व कुंजा रजिता (आंध्रप्रदेश- ५७.६१ सेकंद) यांनी अनुक्रमे सुवर्ण व रौप्यपदक पटकाविले. रियाने आतापर्यंत फेडरेशन स्पर्धेत दोन सुवर्ण व एक रौप्यपदक मिळविले आहे. ती उषाराजे प्रशालेत दहाव्या इयत्तेत शिकत आहे. रघु पाटील, एस.के.म्हसकर व श्री. म्हसकर यांचे तिला मार्गदर्शन मिळत आहे.