PV Sindhu wins Swiss Open 2022 Final: भारताची स्टार बॅडमिंटनपटू पीव्ही सिंधू हिने स्विस ओपन 2022 स्पर्धा जिंकली. सिंधूने थायलंडच्या बुसानन ओंगबामरुंगफान हिच्यावर सरळ गेममध्ये विजय मिळवून मोसमातील दुसरे महिला एकेरीचे विजेतेपद पटकावले. सिंधूने ४९ मिनिटांच्या सामन्यात थायलंडच्या प्रतिस्पर्ध्यावर २१-१६, २१-८ अशी सहज मात केली. २०१९च्या हाँगकाँग ओपनमध्ये या प्रतिस्पर्ध्याने तिच्यावर विजय मिळवला होता. पण तिने तो हिशेब चुकता करत बुसाननवर १७ सामन्यांत १६व्यांदा विजय मिळवला. तिच्या या विजयाचं पंतप्रधान नरेंद्र मोदी, उपराष्ट्रपती व्यंकय्या नायडू आणि अनेकांनी कौतुक केलं.
----
--
गेल्या वर्षी याच स्पर्धेत सिंधूला रिओ ऑलिम्पिक सुवर्णपदक विजेत्या स्पेनच्या कॅरोलिना मारिनकडून अंतिम फेरीत पराभव पत्करावा लागला होता. सिंधूने या वर्षी जानेवारीमध्ये लखनौमध्ये सय्यद मोदी इंटरनॅशनल सुपर ३०० जिंकली होती. सुपर 300 स्पर्धा ही BWF टूर इव्हेंटमधील प्रतिष्ठेची स्पर्धा मानली जाते. सिंधूने तीच लय कायम राखत बुसाननवर विजय मिळवला.