Commonwealth Games 2022 Men's Triple Jump - Final : नितू व अमित पांघल या बॉक्सर्सनी रविवारी भारताला दोन सुवर्णपदक जिंकून दिले. महिला हॉकी संघानेही इतिहास घडविताना कांस्यपदकाची कमाई केली. त्यापाठोपाठ अॅथलेटिक्समध्ये पुरुषांच्या तिहेरी उडीत प्रविण चित्रावेल, अब्दुल्ला अबूबाकेर व एलडोस पॉल यांची कामगिरी उल्लेखनीय झाली. पॉल व अब्दुल्ला यांनी अनुक्रमे सुवर्ण व रौप्यपदक निश्चित केले. कांस्यपदकाच्या शर्यतीत प्रविणला चौथ्या क्रमांकावर समाधान मानावे लागले. अन्यथा तीनही पदकं भारतीयांच्या खात्यात असते. मिल्खा सिंग, नीरज चोप्रा यांच्यानंतर अॅथलेटिक्समध्ये सुवर्णपदक जिंकणारा पॉल हा तिसरा भारतीय ठरला.
तिसऱ्या राऊंड अखेरीस पॉल १७.०३ मीटरसह अव्वल स्थानावर होता, तर चित्रावेल १६.७५ मीटर व अब्दुल्ला १६.७१ मीटर अशा कामगिरीसह अनुक्रमे तिसऱ्या व चौथ्या क्रमांकावर होते. या तिघांमध्ये बर्म्युडाचा जाह-न्हाई पेरीनचिफ ( १६.९२ मी.) हा दुसऱ्या क्रमांकावर होता.