पारोळ : मागील जून महिन्यात सरकारी कामात अडथळा आणल्याबद्दल वसईचे तहसीलदार सुनील कोळी यांनी विरार पोलिसांत दाखल केलेल्या तक्रारीनुसार दोन आरोपींना मागील शनिवारी अटक करण्यात आली आहे. अटक करण्यात आलेल्या या दोन आरोपींनी इतर १५ सहआरोपींची नावे दिली असूनही आठवडा उलटत आला तरी इतर १५ आरोपी पोलिसांच्या हाताबाहेर असल्याने त्यांचा शोध घेऊन त्यांना तत्काळ अटक करावी, या मागणीसाठी श्रमजीवी संघटनेने मोर्चा काढून पोलिसांना जाब विचारला.शनिवारी विरार पोलीस स्टेशनअंतर्गत येणाऱ्या मांडवी पोलीस दूरक्षेत्र येथे श्रमजीवी संघटनेने पदाधिकारी सुरेश रेंजड व गणेश उंबरसाडा यांच्या नेतृत्वाखाली हा मोर्चा काढला होता. याबाबत, लोकमतला माहिती देताना माजी नगरसेविका अनिला धांगडा यांनी सांगितले की, मोकाट आरोपींना लवकर अटक केली नाही तर पुढे तहसीलदार कार्यालयावर मोठा मोर्चा काढण्यात येईल.या कारभाराविरोधात मांडवी पोलीस दूरक्षेत्राचे पोलीस निरीक्षक जंगम यांना निवेदन दिले असून जंगम यांनी आम्ही येत्या दोन दिवसांत मोकाट आरोपींचे लोकेशन ट्रेस करून त्यांना अटक करण्यात येईल, असे आश्वासन दिले असल्याचे त्यांनी सांगितले. (वार्ताहर)
मोकाट आरोपींना अटक करा
By admin | Updated: July 25, 2015 22:18 IST