- नारायण जाधव, उपवृत्तसंपादकनवी मुंबईविमानतळाचे काम वेगाने सुरू असताना इंडिगो, आकासासारख्या कंपन्यांनी नवी मुंबईविमानतळ कंपनीशी विमानोड्डाणासाठी करारनामे करण्यास वेगाने सुरुवात केली आहे. अहमदाबादमध्ये एअर इंडियाच्या ड्रीमलायनर विमानाला झालेल्या अपघातानंतर महत्त्वाच्या शहरांमधील विमानतळांच्या सुरक्षेवर प्रश्नचिन्ह उभे राहिले आहे. यात मुंबईच्या छत्रपती शिवाजी महाराज विमानतळाच्या फनेल झोनमधील ४८ इमारतींच्या उंचीचा प्रश्न न्यायालयात प्रलंबित असतानाच नवी मुंबई विमानतळाच्या टेक ऑफ आणि लँडिंगच्या मार्गात उघड्यावर होणाऱ्या प्राण्यांच्या कत्तलींसह विविध २२५ अडथळे चर्चेत आले आहेत. ‘डीजीसीए’च्या सूचनेनुसार, नोटोम अर्थात ‘नोटीस टू एअरमन’ यादीतील २२५ अडथळ्यांची शर्यत पार करण्याचे आव्हान सिडको आणि नवी मुंबई विमानतळ कंपनीसमोर आहे. यातील प्राणी कत्तलीची तक्रार तर ‘नॅट कनेक्ट फाउंडेशन’ने मुख्यमंत्र्यांकडे केली आहे. तर नोटोमनुसार या विमानतळाच्या मार्गातील अडथळे दूर करण्याची जबाबदारी सिडकोची आहे.
भारताच्या एरोनॉटिकल इन्फॉर्मेशन पब्लिकेशन (एआयपी)नुसार सुरक्षित विमान संचलनासाठी प्रमुख पायाभूत सुविधांसह नवी मुंबई विमानतळाच्या मार्गात ८६ इमारती, ७९ टेकड्या, २३ पॉवर ट्रान्समिशन टॉवर्स, १२ मोबाइल टॉवर्स, ८ फ्लडलाइट पोल हे अडथळे आहेत.
विमानांच्या सुरक्षित हालचालींसाठी ते दूर करण्यास सांगितल्यानंतर विमानतळ कंपनी आणि सिडकोने त्यावर कार्यवाही सुरू केली आहे. याच दरम्यान उलवे, द्रोणागिरी, बेलापूर ते नेरूळ-सीवूड परिसरातील अनेक सोसायट्यांना उंची कमी करण्यासह इमारतींवरील मोबाइल टॉवर, पाण्याच्या टाक्या हटविण्यास सांगितले गेले आहे.
विमानतळाच्या मार्गातील जमिनीचे भाव गगनाला भिडल्याने खास बिल्डर्सच्या आग्रहास्तव सिडकोने नवी मुंबई विमानतळ परिसरातील इमारतींसाठी निर्धारित उंचीचा नियम ५५.१ मीटरवरून थेट १६० मीटरवर नेला आहे. त्यामुळे वाढलेल्या उंचीचे आता काय करायचे हा प्रश्न आहे.
नवी मुंबई विमानतळासाठी आधीच्या प्रस्तावित रडार यंत्रणेची जागा बदलून ती धाकले आयलंडवर नेली आहे. यामुळे बिल्डर्सचे दोन ते तीन हजार कोटींचे प्रकल्प सुटले आहेत. परंतु, सध्या हे रडार कागदावरच आहे.
धाकले आयलंडवरील जेट्टीचे काम प्राथमिक टप्प्यातच आहे. कनेक्टिव्हिटीसाठी रस्ते, पुलांची कामेही धीम्या गतीने सुरू आहेत. विमानतळावर इंधन पुरवठ्यासाठी जेएनपीएतील इंडियन ऑईलपासून विमानतळापर्यंत २२ किमी तर तुर्भेतील एचपीसीलपासून विमानतळापर्यंत १०.४५ किमीची पाइपलाइन टाकण्यास मंजुरी मिळाली आहे.
या कामांना अजूनही गती नाही. मग राष्ट्रीय-आंतरराष्ट्रीय विमानांना लागणारे जेट इंधन आणणार कोठून? या प्रश्नांसह एनआरआय, टीएसचाणक्य, डीपीएस तलावासह पाणजे पाणथळींवरील पक्ष्यांचा अडथळा दूर कसा करणार? हा एक प्रश्न आहे.