नवी मुंबई : पामबीच मार्गावर वेगवान कारच्या अपघाताची घटना रविवारी सकाळच्या सुमारास घडली. सुदैवाने कारमधील तरुण बचावले असून, अपघातानंतर त्यांनी घटनास्थळावरून पळ काढला होता. या दरम्यान कारला लावलेली नंबरप्लेट व आतमधील एका नंबरप्लेटवर भिन्न नंबर असल्याचे काही प्रत्यक्षदर्शींच्या निदर्शनास आले.
पामबीच मार्गावर आगरी कोळी भवन येथील जंक्शच्या ठिकाणी हा अपघात घडला. बेलापूरकडून वाशीच्या दिशेने जाणाऱ्या कार (एम.एच. ४६ बीएफ १९५०)च्या चालकाचा कारवरील ताबा सुटला. यामुळे पलटी झालेली कार रस्त्याच्या दुभाजकावरील झाडे व विजेच्या खांबाला धडकली. हा अपघात इतका भीषण होता की त्यामध्ये कार पूर्णपणे चेपली गेली. मात्र, सुदैवाने एअर बॅगमुळे कारमधील तरुण थोडक्यात बचावले.
सुदैवाने ही कार विरुद्ध दिशेच्या मार्गावर जाऊन इतर वाहनांना धडकली नाही. अन्यथा, मोठ्या दुर्घटनेची शक्यता होती. या अपघातानंतर प्रत्यक्षदर्शींच्या मदतीने ते कारच्या बाहेर आले असता, त्यांनी घटनास्थळावरून पळ काढला. या दरम्यान काही प्रत्यक्षदर्शींनी कारमध्ये डोकावून पाहिले असता, दोन नंबरप्लेटवर भिन्न नंबर आढळून आले. गाडीला लावलेल्या नंबरप्लेटवर व कारमध्ये पडलेल्या नंबर प्लेटवर पूर्णपणे भिन्न नंबर होते; परंतु पोलिसांनी या प्रकाराला दुजोरा दिलेला नाही. मात्र, वेगाने कार चालवून अपघातास कारणीभूत ठरल्याप्रकरणी चालकावर नेरुळ पोलीसठाण्यात गुन्हा दाखल करण्यात आला आहे, त्यानुसार पोलीस अधिक तपास करत आहेत.