विवाहित महिला एका अल्पवयीन मुलीच्या प्रेमात पडल्याची घटना समोर आली आहे. ही महिला पतीला सोडून मैत्रिणीसोबत पळून गेली. दोघींनी मंदिरात लग्न केलं आणि आपल्या लग्नाचा फोटो कुटुंबीयांना पाठवला. फोटो पाहून कुटुंबीयांना मोठा धक्का बसला आहे. या घटनेने परिसरात खळबळ उडाली असून सर्वत्र फक्त याचीच चर्चा रंगली आहे.
हे संपूर्ण प्रकरण यूपीतील बदायूंमधील आहे. दातागंज कोतवाली परिसरातील दोन मुलींनी लग्न केलं आहे. लग्नानंतर दोन्ही मुली बेपत्ता आहेत. कुटुंबीय त्याचा शोध घेत आहेत. दोन्ही मुली कोतवाली परिसरातील वेगवेगळ्या गावातील रहिवासी आहेत. त्यापैकी एक 20 वर्षांची मुलगी आहे. तिचे लग्न झाले आहे. दुसरी मुलगी 17 वर्षांची आहे. या दोन्ही मुली शहरातील एका कपड्याच्या दुकानात काम करत असल्याचं सांगण्यात येत आहे.
20 वर्षीय तरुणीचे कोतवाली भागातील एका तरुणासोबत प्रेमसंबंध होते. याच दरम्यान, या दोघांचे तीन महिन्यांपूर्वी लग्न झाले, मात्र लग्नानंतर काही दिवसांनीच पतीने तिला खोलीत कोंडून ठेवल्याची पोस्ट तरुणीने फेसबुकवर टाकली. ही पोस्ट पाहून काही लोक तिच्या घरी पोहोचले आणि त्यांनी मुलीला तिथून सोडवलं. त्यानंतर ही मुलगी अल्पवयीन मुलीच्या घरी आली. तेव्हापासून दोघीही एकत्र राहत होत्या.
सोमवारी दोघीही बाजारात जात असल्याचं सांगून घराबाहेर पडल्या आणि सकाळपर्यंत घरी परत आल्याच नाहीत. घरातील सदस्य फोन करत होते पण त्यांनी फोन उचलला नाही. मंगळवारी दुपारी फेसबुकवर मुलींच्या लग्नाचे फोटो पाहून कुटुंबीयांना धक्काच बसला. फोटोमध्ये एकमेकींना हार घालत असल्याचं पाहायला मिळत आहे. एका हिंदी वेबसाईटने याबाबतचे वृत्त दिले आहे.