कानपूर : लोकसभा निवडणुकीची रंगत दिवसेंदिवस वाढत चालली आहे. यातच काँग्रेस अध्यक्ष राहुल गांधी आणि त्यांची बहीण प्रियंका गांधी यांचा एक व्हिडीओ व्हायरल होत आहे. यामध्ये दोघेही आपल्या हेलिकॉप्टर संबंधी चर्चा करत आहेत.
राहुल गांधी आणि प्रियंका गांधी यांच्यातील एक चांगली बॉन्डिंग या व्हिडीओच्या माध्यमातून दिसून आली. यावेळी राहुल गांधी यांनी म्हटले आहे की, 'प्रियंका गांधी कमी पल्ल्याचा प्रवास करतात. मात्र त्यांना मोठे हेलिकॉप्टर मिळाले आहे.' हा व्हिडीओ कानपूर एअरपोर्टवरील आहे.
उत्तर प्रदेशात लोकसभा निवडणुकीच्या प्रचार करण्यासाठी राहुल गांधी आणि प्रियंका गांधी कानपूर एअरपोर्ट पोहोचले होते. त्यानंतर दोघांत काहीवेळी चर्चा झाली आणि राहुल गांधी यांनी रायबरेली व प्रियंका गांधी यांनी उन्नावकडे प्रस्थान केले.
दरम्यान, लोकसभा निवडणुकीच्या रणसंग्रामाला सुरुवात झाली आहे. यासाठी सर्वच पक्षाच्या उमेदवारांनी प्रचाराला जोर धरला आहे. तसेच, या निवडणुकीसाठी सत्ताधारी आणि विरोधक यांच्यात आरोप-प्रत्यारोपांच्या फैरी झडण्यास सुरुवात झाल्याने त्यांच्यातील कलगीतुरा चांगलाच रंगात येऊ लागला आहे.